- उत्तराखंड मा थमी कोरोना की रफ्तार
उत्तराखंड मां धीरे-धीरे कोरोना का मामला कम होंणा छन. जनवरी का पैला हप्ता बटी ही कोरोना संक्रमित मरीजुं की संख्या लगातार कम होंणी च. प्रदेश मां अब कोरोना संक्रमितुं की संख्यां 97,019 रै गी. जबकि यां से मन्न वालौ की संख्या 1692 ह्वे गी. प्रदेश मा कोरोना संक्रमित मरीजुं की रिकवरी रेट 96.38% च.
- चमोली आपदा कु आज 24वूं दिन
चमोली आपदा कु आज 24वूं दिन च, आपदा का पैला दिन से अब तक यख लगतार राहत और रेस्क्यू आॉपरेशन जारी च. ई आपदा मा मन्न वालौ की संख्या 70 से ज्यादा ह्वे गी. ई आपदा मा अबी 136 से ज्यादा लोग अभी भी लापता छन, जौ थै ढ़ूढणौं रेस्क्यू ऑपरेशन जारी च.
- गैरसैंण बजट सत्र कू दूसरू दिन
गैरसैंण का भराड़ीसैंण मा आज बजट सत्र कु दूसरू दिन च. बजट का दूसरा दिन सदन मा भराड़ीसैंण लाठीचार्ज का मुद्दा पर खूब हमला ह्वे. यां का विरोध मां आज विपक्षन विधानसभा भवन का गेट पर बैठी सरकार का खिलाफ जमकर नारेबाजी करी, दगड़ा मा ही उन वॉकआउट भी करी
- भराड़ीसैंण मा कैबिनेट बैठक
भराड़ीसैंण मा मुख्यमंत्री त्रिवेंद्र सिंह रावत की अध्यक्षता मा कैबिनेट बैठक ह्वे. बैठक मेा कुल 12 प्रस्ताव रखे गिन. ज्या मां सबी प्रस्तावू पर कैबिनेट न मुहर लगे. बैठक मा कुंभ मेला- 2021 थै भारत सरकार द्वारा निर्गत मानक संचालन प्रक्रिया का अनुपालन थै कैबिनेट न मंजूरी दिनी. यां का दगड़ा ही देहरादून मा देवभूमि उत्तराखंड विश्वविद्यालय की स्थापना थै भी मंजूरी दिये गी.
- सीएम न आंदोलनकार्यूं पर लगै आरोप
विधानसभा कूच मा आन्दोलनकार्यूं पर लाठीचार्ज का मामला मा मुख्यमंत्री त्रिवेंद्र सिंह रावत न प्रतिक्रिया दिनी. सीएम त्रिवेंद्र सिंह न बोली कि मामले की मजिस्ट्रेटी जांच का आदेश दिए गिन, कै भी कीमत पर निर्दोषूं पर कार्रवाई नी होली. दगड़ा मां ही सीएम त्रिवेंद्र सिंह रावत न आंदोलनकार्यूं पर राजनीति कन्नौ भी आरोप लगै.
- लाठीचार्ज का खिलाफ राज्यभर मा प्रदर्शन
चमोली का गैरसैण मा आंदोलनकारयूं पर पुलिस लाठीचार्ज का खिलाफ आज विरोझ प्रदर्शन दिखणौ मिली. प्रदेश की सबी राजनीतिक पार्टीयूं न यां की जमकर निंदा करी. वखी प्रदेश कांग्रेस कमेटी का आह्वान आज मंगलवारौ पूरा प्रदेश मा राज्य सरकार का खिलाफ विरोध-प्रदर्शन ह्वेन.
- हरीश रावत न मांगी सीएमौ इसतीफा
भराड़ीसैंण मा लाठीचार्ज का मामला मा पूर्व हरीश रावत न त्रिवेंद्र सरकार पर हमला बोली. हरीश रावतन बोलि की ये मामला मा मुख्यमंत्री त्रिवेंद्र रावत से इस्तीफा की मांग करी. दगड़ा मा ही ऊन भोल सांकेतिक धरना पर बैठणौ एलान करी.
- हरिद्वार मा मिली नवजात कु शव
हरिद्वार का ज्वालापुर कोतवाली क्षेत्र मा एक नवजात का शव मिन्न से सनसनी फैल गी. कोतवाली क्षेत्र का सुभाष नगर कॉलोनी का ए-6 स्थित खाली प्लाट मा यू शव मिली. मौका पर पौछ्या लोखूं न यां की जानकारी पुलिस थै दिनी. जैका बाद मौका पर पौंछि पुलिस न शव थै कब्जा मा लेकी पोस्टमार्टम थै भेजी
- जनशताब्दी एक्सप्रेस का संचालन थै मंजूरी
कोरोना काल का 11 मैना बाद कोटद्वार-दिल्ली का बीच ट्रेन चन्न जांणी च. ज्या से लोखुं मा खुशी कु माहौल च. बथै द्या कि रेल मंत्रालय न 3 मार्च बटी कोटद्वार से जनशताब्दी एक्सप्रेस चलौणै निर्णय लिनी, ज्या की सबी तैयारी भी पूरी ह्वे गिन.
- एसटीएफ का हाथ लगी अंतरराष्ट्रीय तस्कर
कुमाऊं एसटीएफ न पिथौरागढ़ का सीमावर्ती इलाके का सेरा घाट क्षेत्र मा घेराबंदी करी अंतरराष्ट्रीय वन तस्करूं थै पकड़ी. ई कार्रवाई का दौरान एक तस्कर थै गिरफ्तार करे गी. आरोपी बटी 6 लेपर्ड की खाल, नाखून-दांत और एक ऑल्टो कार बरामद करे गी. एसटीएफ न ये मामला मा मुकदमा दर्ज करेली.
