सीएम धामी न मैन 47वुं जन्मदिन: आज मुख्यमंत्री पुष्कर सिंह धामी न अपणु 47वुं जन्मदिन मनै. उत्तराखंड भाजपा न सीएम धामी का जन्मदिन थै संकल्प दिवस का रूप मा मनै. अपणा जन्मदिन पर सीएम धामी न प्रदेशै खुशहाली कामना करी. दगड़ा मा ही सीएम धामी न बोली औंण वाला दिनूं मा ऊंकी सरकार भ्रष्टाचारियूं पर कड़ी कार्रवाई करली. भर्ती विवाद पर सीएम धामी न बोली ये मामला मा कै भी दोषी थै नी बख्शे जालू.
जन्मदिन पर सीएम धामी न करीन ऐलान: मुख्यमंत्री पुष्कर सिंह धामी न अपणा जन्मदिन का मौका पर प्रदेशवासियूं कु आभार व्यक्त करी. ये दौरान सीएम धामी न घंटाघर मा संकल्प दौड़ थै हरी झंडी दिखै. अपणा जन्मदिन का मौका पर सीएम धामी न उत्तराखंड मा एंटी नारकोटिक्स एक्शन फोर्स कु गठन, 2025 तक उत्तराखंड थै ड्रग्स फ्री कन्नौ संकल्प, भ्रष्टाचार रोकणौ विजिलेंस कु ढांचा बढ़ौणौ और ट्रैपिंग मनी थै 15 सालै बजाय 15 दिन मा वापस दैणौं एलान करी.
'संकल्प दिवस' कार्यक्रम मा खाली रैन कुर्सी: भाजपा न आज प्रदेश भर मा मुख्यमंत्री पुष्कर सिंह धामी का जन्मदिन थै संकल्प दिवस का रूप मा मनै. ई कड़ी मा आज श्रीनगर मा संकल्प दिवस कु आयोजन करे गी. ये कार्यक्रम मा पूर्व मुख्य्मंत्री और हरिद्वार सांसद रमेश पोखरियाल निशंक मुख्य वक्ता का रूप मा कार्यक्रम मा पौंछिन, मगर ये कार्यक्रम मा 40 फीसदी कुर्सी खाली ही नजर ऐन. श्रीनगर मा भाजपा कार्यकर्ताऊं मा सीएम धामी का जन्मदिन और ऊंकी संकल्प कार्यक्रम थै लेकी क्वी खास जोश नी नजर ऐ.
पीएम मोदी का जन्मदिन बटी शुरू होलू भाजपा कु सेवा पखवाड़ा: 17 सितंबरौ पीएम मोदी कु जन्मदिन च. पीएम मोदी का ये दिन थै खास बणौणौ भाजपा कार्यकर्ताऊं न तैयारी शुरू करेन. पीएम मोदी का जन्मदिन बटी 2 अक्टूबर तक भाजपा कार्यकर्ता सेवा पखवाड़ा मनाला. इस दौरान प्रदेश मा कई तरह का कार्यक्रम आयोजित किये जाला. भाजपा संगठन न यां कु थै बूथ स्तर तक सेवा व अन्य कार्यक्रम तय कर्यां छन. यां मा ‘रक्तदान महादान‘, निःशुल्क स्वास्थ्य परीक्षण शिविर, कोविड बूस्टर डोज लगौण जन कार्य शामिल छन.
आरुषि निशंका ब्रांडेड बैग पर कांग्रेस कु हमला: कांग्रेस नेता राहुल गांधी महंगी टी-शर्ट विवाद का बाद अब भाजपा नेता और पूर्व केंद्रीय शिक्षा मंत्री रमेश पोखरियाल निशंकै बेटी आरुषि निशंकौ मैंगू पर्स चर्चाऊं मा च. कांग्रेस प्रवक्ता गरिमा दसौनी न आरुषि निशंकै फोटो ट्वीट करी ये मामला मा भाजपा पर निशाणू साधी. गरिमा दसौनी न लिखी पूर्व केंद्रीय मंत्री रमेश पोखरियाल निशंकै बेटी आरुषि जब 33 हजारौ पर्स ले सकदी त राहुल गांधी 41 हजारै टी-शर्ट किले नी ले सकदन.
21 सितंबर बटी देहरादू मा क्रिकेट कु महाकुंभ: 21 सितंबर बटी देहरादून का राजीव गांधी इंटरनेशनल स्टेडियम मा Road Safety World Series 2022 का मैच खेले जाला. ईं सीरीज मा भाग लेणौ दुनियाभर का दिग्गज खिलाड़ी देहरादून पौंछला. Road Safety World Series का 6 मैच देहरादून का राजीव गांधी इंटरनेशनल स्टेडियम मा खेले जाला. यां कु थै लेकी आज सीरीज का आर्गनाइजरुं न पुलिस-प्रशासन दगड़ि मुलाकात करी. का आर्गनाइजरुं न मैच का दौरान सुरक्षा व्यवस्था थै लेकी एक पत्र भी दिनी
देहरादून मा आयोजित होली मैराथन: सरदार वल्लभ भाई पटेलै जंयती पर उत्तराखंड पुलिस रन फॉर यूनिटी कु आयोजन करली. यां का तहत देहरादून मा मैराथन कु आयोजन किये जालू. ई मैराथन मा 21 किलोमीटर और 10 किलोमीटरै दौड़ करये जाली. यां मा विजेता प्रतिभागियूं थै ₹10 लाख रुप्या की राशि दिये जाली. 30 अक्टूबरौ उत्तराखंड पुलिस देहरादून मैराथन कु चौथूं संस्करण आयोजित करली.
तीन दिनौ फूलों की घाटी मा आवाजाही बंद: विश्व प्रसिद्ध फूलों की घाटी अगला तीन दिन तक पर्यटकूं की आवाजाही थै बंद राली. पार्क प्रशासन न मौसम विभाग का अलर्ट का बाद यू फैसला लिनी. वन क्षेत्राधिकारी गौरव नेगी न बथै कै भी घटना के बचणौ प्रशासन न एहतियात का तौर पर यू निर्णय लिनी. बथै द्या अबी तक रिकॉर्ड 19852 पर्यटक फूलों की घाटी ऐ गीन. फूलों की घाटी 31 अक्तूबरौ पूरी तरह से सीजन मा बंद होली.
उत्तराखंड मा कोरोना का मामला: उत्तराखंड मां धीरे-धीरे कोरोना का मामलौ मा कमी औंणी च. सरकार और स्वास्थ्य विभाग यां कु थै लेकी लगातार प्रयास कन्ना छन. आज प्रदेश मा कोरोना का 34 नया मामला समणि ऐनी, ज्या का बाद प्रदेश मा कोरोना संक्रमितू की संख्या 103,880 ह्वे गी, जबकि यां से मन्न वालौ की संख्या 327 च.
