हंस फाउंडेशन न आपदा पीड़ितूं थै दिनिन 11 करोड़ दान: हंस फाउंडेशन (Hans Foundation) का संस्थापक माता मंगला और भोले महाराज न आज मुख्यमंत्री कैंप कार्यालय मा सीएम धामी दगड़ि मुलाकात करी. ये दौरान फाउंडेशन न पिथौरागढ आपदा पीड़ितूं का सहयोग थै मुख्यमंत्री राहत कोष मा 11 करोड़ रुपया दान करीन यां कु चेक आज ऊंन सीएम धामी थै सौंपी. ज्या का बाद सीएम धामी हंस फाउंडेशन कु आभार व्यक्त करी.
पिरान कलियर थै लेकी शादाब शम्स कु बयान: उत्तराखंड वक्फ बोर्ड का अध्यक्ष शादाब शम्स न पिरान कलियर थै लेकी एक बड़ू और विवादित बयान दिनी. शादाब शम्स न बोली पिरान कलियर सेक्स रैकेट कु अड्डा बण गी. ऊंन बोली पिरान कलियर मा कई अनैतिक कार्य किेये जांणा छन. ऊंन बोली पिरान कलियर मा मानव तस्करी का दगड़ी ही देह व्यापार की भी कई घटनाएं समणि औंणी छन, दगड़ा मा ही यख ड्रग्स तस्करी भी होंणी च.
उत्तराखंड सपा जल्द करली नई कार्यकारिणी कु गठन: समाजवादी पार्टी (Samajwadi Party in Uttarakhand) उत्तराखंड मा जल्द ही नई कार्यकारिणी कु गठन करली. एक सितंबरौ पार्टी न शंभू प्रसाद पोखरियाल थै सपा कु प्रदेश अध्यक्ष बणै, जबकि, सत्यनारायण सचान थै राष्ट्रीय सचिव बणै की बड़ी जिम्मेदारी सौंपी. सपा का नवनियुक्त प्रदेश अध्यक्ष शंभू प्रसाद पोखरियाल न बोली एक मैना का भीतर नई कार्यकारिणी कु गठन किये जालू. नई कार्यकारिणी मा युवाऊं और महिलाऊं की भागीदारी सुनिश्चित किये जाली.
एसडीएम सदर अनिल चन्याल लापता: चंपावत का एसडीएम सदर अनिल चन्याल सरकारी आवास बटी लापता ह्वे गीन. ऊंकु सरकारी मोबाइल भी घौर पर ही च. ऊंकु निजी नंबर भी बंद औणूं च. मामला की जानकारी का बाद कुमाऊं कमिश्नर न डीएम और एसपी चंपावत दगड़ि फोन पर बातचीत करी. कुमाऊं कमिश्नर दीपक रावत न डीएम चंपावत थै सर्विलांसै मदद और सीसीटीवी कैमरों थै चेक कन्ना निर्देश अधिकारियूं थै दिनीन.
हायर एजुकेशन मा ये सत्र मा ही लागू होली एनईपी-2020: उत्तराखंड हायर एजुकेशन मा ये सत्र से ही नई शिक्षा नीति लागू किये जाली. या कु शुभारंभ कन्नौ केंद्रीय शिक्षा मंत्री धर्मेंद्र प्रधान ये मौना उत्तराखंड आला. उच्च शिक्षा मंत्री धन सिंह रावत न बथै केन्द्रीय शिक्षा मंत्री न हायर एजुकेशन मा नई शिक्षा नीति लागू कन्नौ अनुमति दियेली. या कु थै वु बतौर मुख्य अतिथि देहरादून आला. धन सिंह रावत न बोली शिक्षा उत्तराखंड देश कु पैलू राज्य च, जख विद्यालयी शिक्षा मा नई शिक्षा नीति लागू करे गी, अब ये थै उच्च शिक्षा मा भी लागू किये जालू.
पीएम मोदी का जन्मदिन बटी शुरू होलू भाजपा कु सेवा पखवाड़ा: 17 सितंबरौ पीएम मोदी कु जन्मदिन च. पीएम मोदी का ये दिन थै खास बणौणौ भाजपा कार्यकर्ताऊं न तैयारी शुरू करेन. पीएम मोदी का जन्मदिन बटी 2 अक्टूबर तक भाजपा कार्यकर्ता सेवा पखवाड़ा मनाला. इस दौरान प्रदेश मा कई तरह का कार्यक्रम आयोजित किये जाला. भाजपा संगठन न यां कु थै बूथ स्तर तक सेवा व अन्य कार्यक्रम तय कर्यां छन. यां मा ‘रक्तदान महादान‘, निःशुल्क स्वास्थ्य परीक्षण शिविर, कोविड बूस्टर डोज लगौण जन कार्य शामिल छन.
देहरादून मा आयोजित होली मैराथन: सरदार वल्लभ भाई पटेलै जंयती पर उत्तराखंड पुलिस रन फॉर यूनिटी कु आयोजन करली. यां का तहत देहरादून मा मैराथन कु आयोजन किये जालू. ई मैराथन मा 21 किलोमीटर और 10 किलोमीटरै दौड़ करये जाली. यां मा विजेता प्रतिभागियूं थै ₹10 लाख रुप्या की राशि दिये जाली. 30 अक्टूबरौ उत्तराखंड पुलिस देहरादून मैराथन कु चौथूं संस्करण आयोजित करली.
21 सितंबर बटी देहरादून मा क्रिकेट कु महाकुंभ: 21 सितंबर बटी देहरादून का राजीव गांधी इंटरनेशनल स्टेडियम मा Road Safety World Series 2022 का मैच खेले जाला. ईं सीरीज मा भाग लेणौ दुनियाभर का दिग्गज खिलाड़ी देहरादून पौंछला. Road Safety World Series का 6 मैच देहरादून का राजीव गांधी इंटरनेशनल स्टेडियम मा खेले जाला. 21 सितंबरौ पैलू मैच इंडिया लीजेंड्स और बांग्लादेश लीजेंड्स का बीच होलू.
रुद्रप्रयाग जिला मा मिली नयू ताल: रुद्रप्रयाग जिलै मदमहेश्वर घाटी मा एक नयू ताल मिली. यू ताल लगभग 16,500 फीटै ऊंचाई पर स्थित च. ये तालै परिधि लगभग 1 किमी च. ये ताल तक पौंछण मा 6 दिन लगदन. ये ताल तक पौंछणै ट्रेकर्स दल न लगभग पांच मैना तक गूगल अर्थ मैप पर हिमालय कु गहन अध्ययन करी, ज्या का बाद 6 सदस्यीय ट्रेकर्स दल यख सकुशल पौंछि. ये ताल का चारों ओर बीहड़ चट्टान छन, चाल का आसपास बुग्याल नी छन.
उत्तराखंड मा कोरोना का मामला: उत्तराखंड मां धीरे-धीरे कोरोना का मामलौ मा कमी औंणी च. सरकार और स्वास्थ्य विभाग यां कु थै लेकी लगातार प्रयास कन्ना छन. आज प्रदेश मा कोरोना का 20 नया मामला समणि ऐनी, ज्या का बाद प्रदेश मा कोरोना संक्रमितू की संख्या 103,725 ह्वे गी, जबकि यां से मन्न वालौ की संख्या 325 च.
