धामी सरकारै कैबिनेट बैठक: प्रदेश मंत्रिमंडलै आज राज्य सचिवालय स्थित विश्वकर्मा भवन का वीरचंद्र सिंह गढ़वाली सभागार बैठक ह्वे. मुख्यमंत्री पुष्कर सिंह धामी की अध्यक्षता मा ई बैठक मा विभिन्न विभागूं का प्रस्तावूं पर चर्चा ह्वे. ये दौरान कैबिनेट बैठक मा 15 फैसलों पर मुहर लगी. ज्या का तहत जसपुर तहसील बटी 80 गौं थै काशीपुर तहसील मा शामिल करे गी. दगड़ा मा ही परिवहन कर अधिकारी सेवा संवर्गै नियमावली थै भी कैबिनेट बैठक मा मंजूरी दिये गी.
कॉमनवेल्थ पार्लियामेंट्री एसोसिएशन सम्मेलन मा ऋतु खंडूड़ी: राष्ट्रमंडल संसदीय संघा 65वां सम्मेलन मा उत्तराखंडै विधानसभा अध्यक्ष और कोटद्वार विधायक ऋतु खंडूड़ी न शिरकत करी. सम्मेलन मा ऋतु खंडूड़ी उत्तराखंडै पछ्यांण ब्रह्मकमल वाली पहाड़ी टोपी पैनी नजर ऐन. कनाडा का हेलीफैक्स मा आयोजित होंण वाला ये सम्मेलन मा इंडिया रीजन बटी सबी राज्यूं का विधानसभाऊं की पीठासीन अधिकारी मौजूद रैन. कॉमनवेल्थ पार्लियामेंट्री एसोसिएशन कु शुभारंभ कनाडै गवर्नर जनरल मैरी साइमन न करी.
UKPSC मा 30% क्षैतिज आरक्षण पर रोक: उत्तराखंड मूलै महिलाऊं थै हाईकोर्ट बटी बड़ू झटका लगी. उत्तराखंड हाईकोर्ट UKPSC परीक्षाऊं मा महिलाऊं थै मिल्यां 30 प्रतिशत क्षैतिज आरक्षण पर रोक लगेयेली. दगड़ा मा ही ये मामला मा हाईकोर्ट न सरकार से भी जवाब मांगी. ये मामला की अगली सुणवै अब 7 अक्टूबरौ होली. ये मामला मा हरियाणै पवित्रा चौहान समेत उत्तर प्रदेशै महिला अभ्यर्थियूं न कोर्ट मा याचिका दायर करी छै.
फिर खुलली कर्मकार कल्याण बोर्डै फाइल: धामी सरकार एक बार फिर से कर्मकार कल्याण बोर्डै फाइल खोन्न वाली च. अबरी बोर्ड मा खरीद मामलै दोबारा जांच किये जाली. मामला मा राज्य सरकार 2017 से 2022 तकै सभी खरीदूं की ऑडिट करौणै तैयारी कन्नी च. ये दौरान हरक सिंह रावत ये विभाग की मंत्री छा. जानकारी का अनुसार ईं जांच से पूर्व कैबिनेट मंत्री हरक सिंह रावतै घेराबंदी की तैयारी किये जांणी च
धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.
जल्द होलू खिलाड़ी उद्यमान योजना कु शुभारंभ: खेल मंत्री रेखा आर्य न आगामी 29 अगस्त राष्ट्रीय खेल दिवस की तैयारियूं थै लेकी खेल विभाग का अधिकारियूं दगड़ि समीक्षा बैठक करी. या बैठक रेखा आर्य का यमुना कॉलोनी स्थित शासकीय आवास पर ह्वे. बैठक मा खेल मंत्री रेखा आर्य न बथै की 29 अगस्तौ राष्ट्रीय खेल दिवस का मौके पर 8 से 14 वर्ष तक का बच्चों थै मुख्यमंत्री खिलाड़ी उदयमान योजना कु शुभारंभ करला. या का तहत बच्चों थै 1500 रुप्या की खेल छात्रवृत्ति प्रदान किये जाली.
सूबेदार मेजर नंदन सिंहै अंतिम संस्कार: चंपावत का लाल सूबेदार मेजर नंदन सिंह चम्याल कु पार्थिव शरीर आज ऊंका पैतृक गौं लये गी. जख ऊंका परिवार और ग्रामीणूं न नंदन सिंह का अंतिम दर्शन करीन. ये दौरान सैंकड़ों की संख्या मा लोखूं न उंथै नम आंखों से विदाई दिनी. सैन्य सम्मान का दगड़ा सूबेदार मेजर नंदन सिंह चम्याल कु अंतिम संस्कार करे गी.सूबेदार मेजर नंदन सिंह चम्याल थै ऊंका द्वी नौनौं न मुखाग्नि दिनी.
पांच सितंबर बटी केदारनाथै तीसरा चरणै यात्रा शुरू: प्रदेश मा केदारनाथ यात्रा कु पैलू और दूसरू चरण पूरू ह्वे गी. पैला चरणै यात्रा मई और जून मैना मा ह्वे. या मा लगभग नौ लाख तीर्थ यात्री केदारनाथ धाम पौंछिन. जबकि, दूसरा चरणै यात्रा जुलाई और अगस्त मैना मा ह्वे. या मा अब तक एक लाख से ज्यादा भक्त केदारनाथ पौंछिन. अब प्रशासन केदारनाथ यात्रा का तीसरा चरणै तैयारियूं मा जुट गी. पांच सितंबर से केदारनाथै तीसरा चरणै यात्रा शुरू होली. मौसम खुन्ना बाद केदारनाथ थै हेली सेवाऊं कु संचालन भी पांच सितंबर बटी दोबारा शुरू किये जालू.
