- राष्ट्रीय रैंकिंग टेबिल टेनिस प्रतियोगिता कू शुभारंभ
मुख्यमंत्री पुष्कर सिंह धामी ना आज सुबेर परेड़ ग्राउंड स्थित बहुद्देशीय खेल सभाभार मा राष्ट्रीय रैंकिंग टेबल टेनिस प्रतियोगिता कु शुभारंभ करि. या प्रतियोगिता आज बटि 14 दिसंबर तक चलली. सीएम ना अपणा संबोधन मा बोलि- टोक्यो ओलंपिक मा उत्तराखंड का खिलाड़ियों ना करि सर्वश्रेष्ठ प्रदर्शन, खेलों का प्रति युवाओं कू बढ़ि रूझान.
- वंदना कटारिया राष्ट्रीय हॉकी स्टेडियम कू शिलान्यास
हरिद्वार मा नवनिर्मित हॉकी स्टेडियम अब हैट्रिक गर्ल वदंना कटारिया का नौ से जणे जालु. आज खेल मंत्री अरविंद पांडे ना हरिद्वार मा बढ़या राष्ट्रीय स्टेडियम का भितर बहुउद्देश्यीय क्रीड़ा हॉल कू शिलान्यास भी करि. यू बहुउद्देश्यीय क्रीड़ा हॉल 17 करोड़ की लागत से बढ़लु, हरिद्वार की रेण वलि नेशनल हॉकी प्लेयर वंदना कटारिया ना टोक्यो ओलंपिक मा तीन लगातार गोल करि इतिहास रचि छया.
- भाकियू नेता राकेश टिकैत ना MSP कानून की करि मांग
भारतीय किसान यूनियन का राष्ट्रीय प्रवक्ता और किसान आंदोलन का सूत्रधार राकेश टिकैत आज काशीपुर पहुंचिन. यख राकेश टिकैत ना एक विवाह समारोह मा शिरकत करि. वखि मीडिया से बातचीत मा राकेश टिकैत ना केंद्र सरकार से एमएसपी कानून की मांग और किसानों का खिलाफ दर्ज मुकदमो थै वापस लिणा की बात करि.
- पांच दिवसीय हिमवंत कवि चंद्र कुंवर बर्त्वाल शरदोत्सव मेला कू शुभारंभ
मुख्यमंत्री धामी ना चमोली का पोखरी मा पांच दिवसीय पर्यटन शरदोत्सव मेला कू शुभारंभ करि. यू मेला हिमवंत कवि चंद्र कुंवर बर्त्वाल थै समर्पित च, यन मा आज सीएम धामी ना ये मेला थै राजकीय मेला घोषित कू ऐलान भी करि, ऊन बोली कि हर साल सरकार ये मेला कू आयोजना खुण द्वी लाख रुपये की धनराशि देली.
- बीजेपी और बसपा नेताओं थै गणेश गोदियाल ना दिले कांग्रेस की सदस्यता
उत्तराखंड मा विधानसभा चुनौ खुण अब कुछ ही समय शेष बच्युं च, यन मा सबि पार्टी अपणा-अपणा सगंठन कू विस्तार कन मा जुटी च, ये कड़ी मा आज कांग्रेस मुख्यालय मा प्रदेश अध्यक्ष गणेश गोदियाल ना बीजेपी और बसपा नेताओं थै पार्टी की सदस्यता दिले, बसपा का मुल्की राज सैनी और बीजेपी का टीसी भारती आज कांग्रेस मा शामिल ह्वेनि.
- सचिवालय कर्मचारियों की हड़ताल फिर शुरू
उत्तराखंड सचिवालय कर्मचारी एक बार फिर अपणि मांगों थै लेकि आज से फिर हड़ताल पर बौढ़ गेनि. बीता दिन सचिवालय मा मुख्यमंत्री कू अभिनंदन समारोह आयोजित किये ग्या छाई. जैका कर्मचारियों की मांगों थै लेकि सीएम ना कुई घोषणा नि करि. जैका बाद एक बार फिर आज से सचिवालय कर्मचारियों ना हड़ताल शुरू कर दै.
- यशपाल आर्य का खिलाफ मुकदमा दर्ज हुण पर हरदा ना जतै आपत्ति
उधम सिंह नगर की बाजपुर कोतवाली मा कांग्रेस नेता और पूर्व कैबिनेट मंत्री यशपाल आर्य का खिलाफ मुकदमा दर्ज हुण पर हरीश रावत ना अपणि आपत्ति दर्ज करै. हरीश रावत ना अपणा ट्वीट मा लिखी. मारो भी और रुण भी नि दयव. यि कहावत बाजपुर मा चरितार्थ हुणी च, खनन माफियाओं ना यशपाल आर्य पर जानलेवा हमला करि, खनन माफिया पर कार्रवाई कना कि बजाय, पुलिस ना यशपाल आर्य का खिलाफ ही मुकदजा दर्ज कयालि.
- सीएम धामी ना भीमताल मा जनसभा थै करि संबोधित
मुख्यमंत्री धामी ना भीमताल का ओलकांडा पौंचि 23 करोड़ से जादा विकास योजनाओं कू करि लोकार्पण और शिलान्यास, आगामी चुनौ का मद्देनजर सीएम धामी कू भीमताल दौरा महत्वपूर्ण, वखि ये मौका पर सीएम धामी मा खनस्यू मा जनसभा थै भी करि संबोधित, सीएम धामी ना बोली- 2025 तक नबंर वन बड़लु उत्तराखंड, विकास थै लेकि सरकार प्रतिबद्ध.
- कांग्रेस ना पिथौरागढ़ हेलीकॉप्टर सेवा मा उठैन सवाल
सीमांत जनपद पिथौरागढ़ मा हेलीकॉप्टर सेवा यात्रियों खुण परेशानी की सबब बणि च. मौसम खराब और तकनीकी खामियों का चलदा यख हवाई यात्रियों की फजीहत हुणी च, यन मा विपक्ष थै भि सरकार पर हमलावर हुणा कू मौक मिल गया. कांग्रेस ना पिथौरागढ़ मा हेलीकॉप्टर सेवा थै फ्लॉप शो बताई, ऊन बोली सरकार लौखु थै ठगणा कू काम कनि च.
- विकासनगर मा बूढ़ी दिवाली की धूम
जनजातीय क्षेत्र जौनसार बावर मा पारंपरिक त्योहार बड़ा धूमधाम से मनै जंदिन, यन मा अजकाल जौनसार बावर क्षेत्र मा बूढ़ी दिवाली धूम धाम से मनै ग्या. वखि आज हिरण और हाथी नृत्य का साथ बूढ़ी दिवाली कू समापन भि ह्वे गया. विकासनगर का गौं खोलों मा ग्राणीण पारंपरिक वेशभूषा मा तांदि, झैंता और हारूल नृत्य करदि दिखेन.
