अपणुं उत्तराखंडः दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

जोशीमठ जल प्रलय ते आज 14वूं दिन च. इं प्राकृतिक आपदा मा अभी तक 62 शव मिल गिन. तपोवन टनल मा रेस्क्यू ऑपरेशन जारी च. ये काम मा आईटीबीपी, एनडीआरएफ, एसडीआरएफ टीम लग्यां छिन. अभी भी कई लोग लापता छिन.

चमोली जिला का जोशीमठ आपदा मा रेस्क्यू टीम लगातार जुटीं च. अब तक 62 शव बरामद ह्वे गिन. वखि, कई लोग अभी भी लापता छिन. वखि, इं हादसा पर अब सियासत चन्नी च. पूर्व मुख्यमंत्री हरीश रावत न आपदा रेस्क्यू मामला मा त्रिवेंद्र सरकार ते फेल बते. वखि जवाब मा सीएम त्रिवेंद्र सिंह रावत न ऊंते नसीहत दे और बोली कि ऊंते यू बोन्ने हक नि च.

उत्तराखंड मा कई हैंगिंग ग्लेशियरों का टूटंण से चमोली आपदा का दौरान ऋषिगंगा नदी मा अचानक मलबा ए गी छो. मलबा से बणिं झीले गहराई नापंण अब नई चुनौती बंण गी. इं झील पर भविष्य मा खतरा न हो, नौसेना का गोताखोर झीले गहरे नापंण मा लग गिन.

चमोली जिला का तपोवन मा ए जल प्रलय का दौरान नरेंद्रनगर का गूलर मा आलम सिंह पुंडीरे मौत ह्वे गी छे. आलम सिंहे मौत का बाद ऊंकी चार नौनियां अनाथ ह्वे गिन. अभिनेता सोनू सूद न ऊं नौनियूं ते गोद लेला.

पूर्व पीएम राजीव गांधी का करीबी और पूर्व केंद्रीय मंत्री सतीश शर्मा की अस्थियां आज हरिद्वार हरकी पैड़ी मा विसर्जित ह्वे गिन. ऊंकु निधन बीता बुधवार का दिन गोवा मा ह्वे छे.

आज सुबेर दिल्ली बटि द्वाराहाट ते ओंण वली मैक्स रामनगर मार्ग पर चौड़ीघट्टी का पास गहरी खै मा गिर गी. इं हादसा मा द्वी लौखुं मौत ह्वे गी. जबकि पांच लोग घायल छिन.

एसएसबी का कमांडेड बीपीएश नेगी कु बोन्न च कि नेपाल बटि पेट्रोलियम पदार्थों की तस्करी नि होंणी च. ऊं बोली कि बॉर्डर पर एसएसबी की टीम लगातार पेट्रोलिंग कन्नी च त तस्करी कु त सवाल ही नि च.

देशभर मा पेट्रोल और डीजले दाम लगातार बढ़णा छिन. विरोध मा कांग्रेस पार्टी न प्रदेश और केंद्र सरकार का खिलाफ सड़क पर प्रदर्शन करी. चंपावत मा कांग्रेसियूं न दोपहिया वाहनों ते धकेलकी प्रदर्शन करी त हल्द्वानी मा कांग्रेसियूं न पदयात्रा निकाली. प्रदेशभर का कई इलाकों मा कांग्रेस और कई पार्टियूं कु प्रदर्शन ह्वे.