अपणुं उत्तराखंडः दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

संसद का द्वी सत्रों ते संबोधित करदी दां राष्ट्रपति रामनाथ कोविंद कई बातों पर अपणिं बात रखी. ऊं बोली कि चेन्नई बटि पोर्ट ब्लेटर तक सबमरीन ऑप्टिकल फाइबर केबल हो या अटल टनल या फिर उत्तराखंड चारधाम परियोजना, हमरु देश विकास का रथ पर अग्ने बढ़णुं च.

आगामी एक फरवरी का दिन वित्त मंत्री निर्मला सीतारमण आम बजट पेश करली. कोरोना काल का बाद और दशक कु पेहलु आम बजट होलु. तमाम राज्यों का साथ ही उत्तराखंड राज्य ते भी बजट दगड़ी खास उम्मीद च. इं बीच केंद्रीय बजट से पेहली राज्य सरकार प्रदेशे चुनौती और आर्थिक समस्याओं कु प्रस्ताव केंद्र सरकार ते भेज चुकीं च.

दिल्ली का सिंघु बॉर्डर पर आज किसान प्रदर्शनकारियों और स्थानीय लौखुं का बीच खूब बवाल ह्वे. द्वी गुटों का बीच पत्थरबाजी भी ह्वे. घटना की सूचना पर मौका पर पौंछी पुलिस टीम पर भी हमला ह्वे. बते जांणू च कि एसएचओ प्रदीप कुमार पर केन तलवार से हमला करी. वखि, किसान आंदोलन पर यूपी की मुजफ्फरनगर मा देर शाम तक महापंचायत ह्वे.

बीता 26 जनवरी का दिन दिल्ली मा ह्वे हिंसा का खिलाफ पुलिस कार्रवे कन्नी च. मामला मा दिल्ली पुलिस न वीडियो और तस्वीरों का जरिया हुड़दंग मा शामिल उत्तराखंड का किसानों की तलाश शुरू करेली. ऊंकी पहचान होंणी च.

सीएम न विधायक ते पौंछाई अस्पताल

मुख्यमंत्री त्रिवेंद्र सिंह रावत आज पौड़ी एक कार्यक्रम मा पौंछी छा. यख विधायक दिलीप रावत की तबीयत खराब ह्वे गी. जेका बाद सीएम रावत न प्रोटोकॉल तोड़ीकी ऊंते अपना हेलीकॉप्टर मा बैठे और ऋषिकेश एम्स पौंछे.

आतंकी हमला मा शहीद ह्वयां असम रायफल का जवान रणवीर सिंह कु पार्थिव शरीर ऊंका घौर हल्द्वानी पौंछी. यख सैन्य सम्मान का साथ ऊंकु अंतिम संस्कार ह्वे. इं मौका पर लौखुं हुजूम उमड़ी. वू मूल रुप से चमोली जिला का थराली का रोंण वला छा.

उत्तराखंड राज्य आंदोलनकारी और बीजेपी का वरिष्ठ नेता रविंद्र जुगरान न आज आम आदमी पार्टी कु दामन थामेली. ऊंन अपणां समर्थकों का साथ आप ज्वाइन करी. इं मौका पर ऊंते आप विधायक और उत्तराखंड प्रभारी दिनेश मोहनिया न पार्टी सदस्यता दिले.

महाकुंभ पर संतो की राय जरूरी

हरिद्वार महाकुंभ खुंण केंद्र का बाद राज्य सरकार कुछ दिनों बाद एसओपी जारी करेली. मामला मा आज अखाड़ा परिषद का अध्यक्ष नरेंद्र गिरी न बोली कि उत्तराखंड सरकार ते कुंभे स्वरुप पर संतो की राय लेंण चेंदी.

कोरोना संक्रमण का चलदा हिंदुओं की पवित्र कैलाश मानसरोवर यात्रा नि ह्वे पे. इं बार भी इं यात्रा पर असमंजस बरकरार च.