- देश मा कोरोना कु कहर
देश मा लगातार कोरोना कु कहर बढदू जांणू च. भारत मा अब तक कोरोना का 47, 54, 356 मामला समणि ए गिन. जबक या से मन्न वालौ की सख्यां 78, 586 पौंछि गी. देश मा हर रोज कोरोना का मामला लगातार बढ़णा छन.
- तीन पैट्रोलियम परियोजनाउं थै पीएम न करी थै राष्ट्र का नौ
बिहार चुनाव से पैली आज प्रधानमंत्री मोदीन तीन पैट्रोलियम परियोजनाउं थै राष्ट्र का नौ समर्पित करी. यूं परियोजनाउं मां पारादीप-हल्दिया-दुर्गापुर पाइपलाइन परियोजना कु दुर्गापुर-बांका खंड और द्वी एलपीजी बॉटलिंग प्लांट शामिल छन. ये मौका पर बिहार का सीएम नीतिश कुमान भी उं दगड़ि मौजूद रैन.
- फिर से एम्स अस्पताल मां भर्ती अमित शाह
ब्याली देर रात गृहमंत्री अमित शाह की तबीयत बिगड़ी. जैका बाद उछै थै आज एक बार फिर से एम्स अस्पताल मां भर्ती करये गी. बथये जांणु च कि उथै सांस लेंण मा तकलीफ होंणी छै, जैका कारण उंथै अस्पताल मां भर्ती करये गी. यां से पैली भी अमित शाह थै कोरोना का कारण द्वी बार अस्पताल मां भर्ती होंण पणी छौ.
- पूर्व केंद्रीय मंत्री रघुवंश प्रसाद कु निधन
राजद का वरिष्ठ नेता और पूर्व केंद्रीय मंत्री रघुवंश प्रसाद कु आज दिल्ली का एम्स अस्पताल मां निधन ह्वे गी. रघुंवश प्रसाद सिंह कई दिनुं बटी फेफडों का संक्रमण का कारण अस्पताल मां भर्ती छा. वु पिछला द्वी दिनी बटी वेटिलेटर पर छा. रघुवंश प्रसाद बिहार का बडा नेताउं मां शामिल छा.
- उत्तराखंड मां लगातार बढ़णा कोरोना का मामला
उत्तराखंड मां भी कोरोना कु कहर कम नी होंणू च. प्रदेश मा अब तक कोरोना संक्रमितु कु आंकड़ा 30, 336 का पार पौंछि गी. जब यां से मन्न् वालौ की संख्या 402 च. सरकार और स्वास्थ्य विभाग कोरोना का लगातार बढ़दा मामलौ थौ रोकणौ लगातार कदम उठौणा छन.
- एयरफोर्स की गतिविध्यूं थै लेकी जल्द भूमि कु चयन
उत्तराखंड मां एयरफोर्स की गतिविध्यूं थै बढ़ावा दैणों जल्द ही भूमि कु चयन किये जलू.यां कु थै सीएम त्रिवेंद्र सिंह रावतन अधिकार्यूं थै निर्देशित करेली. यां से पैली एयर मार्शल राजेश कुमारन एयरफोर्स की जमीन का चिह्नीकरण थै लेकी सीएम दगड़ि मुलाकात करी छै.
- देवेंद्र यादव से मिली कांग्रेस प्रतिनिधिमंडल
आज उत्तराखंड कांग्रेस का शीर्ष नेताउं का एक प्रतिनिधिमंडल न दिल्ली मां नवनियुक्त प्रदेश प्रभारी देवेंद्र यादव दगड़ि मुलाकात करी. ये दौरान प्रतिनिधिमंडल न देवेंद्र यादव थै नई जिम्मेदारी मिन्ना साथ-साथ उंथै जन्मदिनै बधाई दिन. ये शिष्टमंडल ने प्रदेश प्रभारी देवेंद्र यादव दगड़ि करीब 1 घंटा बातचीत करी. ज्यामा राज्य का हालातुं पर चर्चा करे गी
- पीएम मोदी की पसंद मंगेश घिल्डियाल
उत्तराखंड का तेज-तर्रार आईएएस अधिकारी और टिहरी जिलाधिकारी मंगेश घिल्डियाल थै पीएमओं मां बड़ी जिम्मेदारी मिली. मंगेश घिल्डियाल थै पीएमओ मां अंडर सेक्रेटरी का पद पर नई तैनीती मिली. मंगेश घिल्डियाल थै अपणा या नई जिम्मेदारी अगला तीन हफ्तों मां संभलन च.
- भोल बटी कुमाऊं विश्वविद्यालय की वार्षिक परीक्षाएं
भोल बटी कुमाऊं विश्वविद्यालय की वार्षिक परीक्षाएं शुरु होंणी छन. जै थै लेकी विश्वविद्यालय न सबी तैयारी पूरी करेनी. कोरोना संक्रमण का कारण इबरी दां विश्वविद्यालय की ओर से छात्रुं थै खास इंतजाम करेगिन. यां मा थर्मल स्क्रीनिंग, सैनिटाइज, सोशल डिस्टेंसिंग आदि व्यवस्था शामिल छन.
- राज्य आंदोलनकारी बीएल सकलानी कु निधन
ब्याली रात वरिष्ठ राज्य आंदोलनकारी बीएल सकलानी कु हृदय गति रुकण से निधन ह्वे दी. बीएल सकलानी 76 वर्षा छा. राज्य आंदोलनकार्यू न बीएल सकलानी का निधन पर शोक व्यक्त की. वखी यूकेडी न भी बीएल सकलानी का अकस्मात निधन पर उथै भावभीनी श्रद्धांजलि अर्पित करी.
