अलविदा 2019: बड़ सुरता आही छत्तीसगढ़ महतारी के दुलरवा मन...

2019 के बछर बस खत्म होवइया हे. एक डाहार ऐ बछर ह छत्तीसगढ़ के कलाकार मन बर बने रिहिस. काबर की "हंस झन पगली फंस जबे" जइसन सुपरहिट फिलिम ह हमर परदेस म तहलका मचा दे रिहिस. त दूसर डाहार "दाऊ मंदराजी" फिलिम ह बढ़ चर्चा के बिषय म रिहिस. एखर संग-संग कतको फिलिम ल सिनेमाघर म जगह मिलिस. फेर दूसर कोती ए बछर म कतको कलाकार हमर संग ल छोड़ के चल दिस. ए बछर ह 6 बड़का कलाकार ल हमर ले छिन लिस. प्रदेस के 'चार्ली चैप्लीन' कहे जाने वाला नत्थू दादा, जेन ए बछर के अखिरी म ए दुनिया ल छोड़ दिस. मुख्यमंत्री के संगी मिथिलेश साहू ह एहि बछर सब ल छोड़ के चल दिस. जेखर सुरता म मुख्यमंत्री भूपेश बघेल ह रो पड़िस. झन भूलव मां बाप म बाप के भूमिका निभाने वाला अशीस चंद्र, एखर संगे संग सूरज तिवारी, देवीलाल नाग अउ अमरदास जइसन कलाकार मन ल 2019 ह हम सब ले दुर लेगे. छत्तीसगढ़ महतारी के मान बढ़िया जम्मो कालाकार ल कोनो नई भुला सकय इखर सुरता ह अजर अमर होगे.