कांकेर के सीताफल के चलथ हे रायपुर म जादू, मेहनत ले ए बहिनी मन संवारत हवय जिनगी

नक्सल प्रभावित कांकेर के सीताफल ह राजधानी रायपुर के मनखे मन के मुहुं ल मीठा करत हवय. जाड़ के मउसम ह सीताफल के होथे. बस्तर अंचल म सीताफल के अब्बड़ फसल होथे, अउ इही सेती कांकेर के सीताफल के डिमांड रायपुर म जादा हवय. एखर ले आदिवासी दाई-बहिनी मन के सुग्घर कमई होवत हवय. कांकेर के चारामा तहसील के तिरकादंड गांव के दाई-बहिनी मन ह एक ठन स्वसहायता समूह बनाए हवय, जेखर नांव सहेली महिला ग्राम संगठन हरय. ए बहिनी मन ह आस-पास के गांव ले सीताफल ल खरीदथे अउ ओला बेचे बर रायपुर आथे. बहिनी मन बताथे कि ओ मन ल सीताफल बेचे बर उत्तर बस्तर के जिला प्रसासन अउ कृषि विभाग ह सीताफल ल रखे बर डब्बा देथे. अउ एखर साथे-साथ रायपुर आए बर गाड़ी के सुविधा घलो देथे.  जबर के बात ए हरय कि ए दाई-बहिनी मन रातकिन 9.30 बजे ले कांकेर ले रायपुर बर निकलथे अउ आधा रात के 2 बजे रायपुर पहुंचथे. उहां जाए के बाद तेलीबांधा तरिया कना जम्मों अंधियारी रात गुजारथे. अउ बिहिनिया होवत ले सीताफल के बिक्री सुरु हो जाथे. ए दाई बहिनी मन अपन सब्बो सीताफल ल बेच के ही इहां ले वापस जाथे. प्रसासन के मदद ले ए आदिवासी बहिनी मन सस्कत होवत हवय अउ अपन जिनगी म स्वावलंबी बनत हवय.