कातिक पुन्नी के मउका म प्रदेस के मुखिया ह खारुन म लगाइस डुबकी

रायपुर : कातिक महीना म सुरज उगे के पहिली नहाए के अउ दीपदान करे के जुन्ना परंपरा हमर प्रदेस म हवए. यही परंपरा ल आगु बढ़ावत आज कातिक पुन्नी के पावन मउका म मुख्यमंत्री भूपेश बघेल ह खारुन नदिया म आस्था के डुबकी लगाइस. बिहनिया साढे पांच बजे मुख्यमंत्री महाजदेव घाट म पहुंच गे रहिस. ओखर संगे संग विधायक सत्यनारायण शर्मा, विकास उपाध्याय, महापौर प्रमोद दुबे घलो रहिन. आज महादेव घाट म पुन्नी मेला के भी आयोजन करे जात हे. मुख्यमंत्री भूपेश बघेल ह सत्ता सम्हाले के बाद लगातार छात्तीसगढिया परंपरा ल आघु बढावत हे. यिही कड़ी म आज वोहा सूरज उगे के पहिली खारुन म स्नान करिस अउ प्रदेश के खुशहाली के कामना करिस हे.