વાપીઃ રહેણાંક ઇમારતમાં આવેલી ટ્રાન્સપોર્ટ ઓફિસમાં આગ લાગતાં અફરા-તફરી

વાપીના ગુંજન વિસ્તારની રહેણાંક ઇમારતમાં આવેલી ટ્રાન્સપોર્ટ ઓફિસમાં શુક્રવારે રાત્રે ભીષણ આગ ભભૂકી ઉઠતાં ભાગદોડ મચી હતી. જો કે ફાયર બ્રિગેડના જવાનોએ સમયસૂચકતા વાપરી રહેવાસીઓને ઇમારત ખાલી કરવાની સૂચના આપી, આગ પર પાણીનો મારો ચલાવી આગ પર કાબૂ મેળવ્યો હતો. આ ઘટનામાં કોઈ જાનહાનિ થઈ ન હતી.

વાપી: શહેરના ગુંજન વિસ્તારમાં આવેલા દર્શના એપાર્ટમેન્ટમાં શુક્રવારે રાત્રે આગની ઘટના બની હતી. રહેણાંક ઇમારતમાં એક ટ્રાન્સપોર્ટની ઓફિસ આવેલી છે. આ ઓફિસમાં અગમ્ય કારણોસર આગ ભભૂકી ઉઠતાં રહેવાસીઓમાં ગભરાટનો માહોલ ફેલાયો હતો. આગને વધુ પ્રસરતી રોકવા તાત્કાલિક ફાયર વિભાગને જાણ કરતાં ફાયર વિભાગે 2 વૉટર બ્રાઉઝર ટીમને મોકલી સલામતી ખાતર ઇમારતમાં રહેતાં લોકોને ઇમારતની બહાર બોલાવી ઇમારત ખાલી કરાવી પાણીનો મારો ચલાવી આગ પર કાબૂ મેળવ્યો હતો.

વાપીઃ રહેણાક બિલ્ડિંગમાં આવેલી ટ્રાન્સપોર્ટ ઓફિસમાં આગ લાગતાં બિલ્ડિંગ ખાલી કરાવાઈ

આગની ઘટનામાં કોઈ જાનહાનિ નહીં થતાં લોકોએ અને તંત્રએ રાહતનો શ્વાસ લીધો હતો. જ્યારે આગનું કારણ અકબંધ રહ્યું હતું. રહેણાંક ધરાવતી બિલ્ડિંગમાં આ પ્રકારે થઇ રહેલી વ્યાવસાયિક પ્રવૃત્તિ અને તેને લગતાં જોખમો અંગે સચેતતા વર્તવી તંત્ર માટે આવશ્યક તો છે, પરંતુ તેના લીધે આગ જેવી ઘટના બને ત્યારે મોટાપાયે માનવ જાનહાનિનો મોટો ભય ઊભો રહે છે, ત્યારે આ ઘટનામાં સમયસર આગ પર કાબૂ મેળવી લેવાતાં જાનહાનિથી બચી શકાયું છે. પરંતુ રાતોરાત લોકોને રસ્તા પર રાત ગુજારવાનો સમય આવી ગયો હતો.