વાપીની અમર જ્યોત કંપનીમાં ગેસ ગળતર થતા 3 કામદારો ગંભીર

વાપી :વલસાડ જિલ્લાના ઔદ્યોગિક વસાહત ગણાતા વાપી GIDCમાં આવેલી અમર જ્યોત નામની કંપનીમાં ગેસ ગળતરની ઘટના બની હતી. જેમાં કંપનીમાં કામ કરતા 3 કામદારોને ગુંગળામણ થતાં તેમને હોસ્પિટલમાં સારવાર માટે ખસેડાયા હતાં.

વાપી GIDC માં સેકન્ડ ફેઈઝમાં આવેલી અમર જ્યોત નામની કંપનીમાં કામ કરતા કામદારોને ગેસ ગળતરની અસર થઈ હતી. કંપનીમાં કામ પર ગયેલા કામદારો પોતાની શિફ્ટ પુરી કરી કંપનીમાંથી છૂટી ઘરે આવ્યાં હતાં. તે દરમિયાન અચાનક તેમની તબિયત બગડી હતી. જે ધ્યાને આવતા તેને તાત્કાલિક વાપીની ખાનગી હોસ્પિટલમાં અને ત્યારપછી વધુ સારવાર માટે વલસાડની સિવિલ હોસ્પિટલમાં ખસેડાયા હતા.

તમામની હાલત નાજુક હોવાથી સિવિલ હોસ્પિટલમાં સારવાર હેઠળ રખાયા છે. આ સમગ્ર ઘટના અંગે કંપની સંચાલકોને જાણ કરવા છતાં કંપનીમાંથી કામદારો પાસે હજી સુધી કોઈ આવ્કાયું નથી. જેથી કામદારોના પરિવારમાં રોષ જોવા મળ્યો હતો..