શું છે સમગ્ર ઘટના...?
- પરિવારના મોભી વહેલી સવારે ઈલેકટ્રીક મોટરની સ્વીચ ચાલું કરવા જતા કરન્ટ લાગ્યો
- તેમને બચાવવા તેમના પત્નિ અને પુત્ર દોડી જતા તેઓ પણ વીજ કરન્ટની ઝપેટમાં આવ્યા
- પરિવારના વધુ એક સદસ્ય આ ત્રણેયના સંપર્કમાં આવતા તેમને પણ વીજ કરન્ટ લાગ્યો
- આ ઘટનામાં 3 લોકોના મોત જ્યારે 1 ઇજાગ્રસ્ત
વલસાડઃ જિલ્લાના પારડી તાલુકાના પરિયા ગામે તળાવ નજીક આવેલા બ્રાહ્મણ ફળિયામાં રહેતા ઉપેશ ભાનાભાઈ પટેલ આજે સોમવારની વહેલી સવારે તેમના ઘર આંગણે આવેલી પેજારીમાં ઈલેકટ્રીક મોટરની સ્વીચ ઑન કરવા ગયા હતા. તે દરમિયાન કરન્ટન લાગતા તેઓએ બૂમાબૂમ કરી હતી. જેને લઇને તેમને બચાવવા માટે તેમની પત્ની કોકિલાબેન અને 18 વર્ષીય પુત્ર વિરલ બન્ને દોડી ગયા હતા.
જો કે, આ બન્ને લોકો પણ ઉપેશભાઈના સંપર્કમાં આવતા આ ત્રણેયને વીજ કરંટ લાગ્યો હતો. જેના પગલે ત્રણેય લોકો પહેલા બેહોશ થઈ ગયા હતા. અચાનક આવેલા અવાજના પગલે ઉપેશની માતા સવિતા બેન (ઉ.વ 60) સ્થળ ઉપર આવી બચાવવાની કોશિશ કરવા જતાં તેઓ પણ આ ત્રણેયના સંપર્કમાં આવ્યા હતા અને તેમને પણ ઇલેક્ટ્રિક કરન્ટનો ઝટકો લાગ્યો હતો.
અચાનક બનેલી ઘટનાના પગલે આસપાસના સ્થાનિકો દોડી આવ્યા હતા અને ઇલેક્ટ્રિક લાઇન બંધ કરી ભોગ બનેલા ચારેય લોકોને પારડી મોહન દયાળ હોસ્પિટલમાં ખસેડવામાં આવ્યા હતા. જ્યાં પિતા, પુત્ર અને પત્ની ત્રણેને મૃત જાહેર કરતા એક જ પરિવારના ત્રણના મોત થતા સમગ્ર ગામના ગમગીનીની માહોલ જોવા મળ્યો હતો.
આ ઘટનાની જાણકારી મળતા પારડી પોલીસ મથકના PSI એસ. બી. ઝાલા, DySP મનોજસિંહ ચાવડા સહિત FSLની ટિમે ઘટનાસ્થળ મુલાકાત લઈ પરિવારજનોને સાંત્વના આપી હતી. તેમજ ઘટનાનો તાગ મેળવવા પ્રયાસ હાથ ધર્યો હતો.
નોંધનિય છે કે, ચોમાસા દરમિયાન ઈલેકટ્રીક કરન્ટ લાગવાની ઘટનાઓ બનતી રહે છે. ઇલેક્ટ્રિક વિભાગ દ્વારા અનેકવાર તકેદારીના ભાગ રૂપે લોકોમાં જાગૃતતા લાવવા પ્રયાસ કરવામાં આવે છે. તેમ છતાં લોકો ચોમાસા દરમિયાન તકેદારી ન રાખતા આવી ઘટનાઓ બનતી રહે છે.
