દમણ પ્રશાસનની બેવડી નીતિ સામે વલસાડની બલિઠા ગ્રામ પંચાયતે દમણ-બલિઠા બોર્ડર કરી સીલ

વલસાડ જિલ્લાના વાપી તાલુકાના બલિઠા ગામ અને દમણને જોડતી સરહદને બલિઠા ગ્રામપંચાયતે સીલ કરી દીધી છે. દમણ પ્રશાસન દ્વારા ગુજરાતના લોકોને પ્રવેશ આપવામાં આવતો નથી. ઉદ્યોગોમાં આવતી ટ્રકના ડ્રાઈવરને ને જ એન્ટ્રી આપવામાં આવે છે. ક્લીનરને બલિઠા ગામમાં જ રહેવું પડે છે. આ કોરોના સંક્રમણની દહેશત હેઠળ પંચાયતે વલસાડ કલેકટર સાથે આ અંગે રજૂઆત કરી હતી. જે બાદ આ બોર્ડરને સીલ કરી દીધી છે.

વલસાડ : જિલ્લાના બલિઠા ગામને જોડતી દમણ સરહદને બલિઠા ગ્રામ પંચાયતે સીલ કરી દીધી છે. આ અંગે બલિઠા ગામના સરપંચ મનીષ પટેલ અને વાપી તાલુકાના કારોબારી અધ્યક્ષ કેતન પટેલે જણાવ્યું હતું કે, એક તરફ બલિઠા ગામમા કોરોના પોઝિટિવ કેસ સામે આવ્યા બાદ ક્લસ્ટર કન્ટેઇનમેટ અને બફર ઝોન જાહેર કરવામાં આવ્યો છે. એવામાં દમણમાં જતા અને આવતા મુંબઈ-કર્ણાટકના ટ્રક જેવા ભારે વાહનો બલિઠા ગામની હદમાંથી પ્રવેશ મેળવે છે.

આ સમયે દમણ પ્રશાસન દ્વારા વાહનોને સેનેટાઇઝ કરી માત્ર ડ્રાઈવરને જ વાહન લઈ જવાની પરમિશન આપે છે. એટલે બલિઠામાં વાહનોની કતારો લાગે છે, અને ક્લીનર-મજૂરો બલિઠા ગામમાં જ ધામાં નાખીને પડી રહી છે. જેનાથી કોરોનાનું સંક્રમણ ફેલાવાની દહેશત ગામ લોકોમાં વ્યાપક બની હતી. જેને લઈને પંચાયતે એક ઠરાવ પસાર કરી આ ઠરાવ આધારે કલેકટર વલસાડ સાથે રજૂઆત કરી દમણ બલિઠાની સરહદને સીલ કરી દીધી છે.ઉલ્લેખનીય છે કે, દમણ પ્રશાસનની બેવડી નીતિન કારણે વાપીના અને દમણમાં વેપાર ધંધો કરતા વેપારીઓને પ્રશાસન દમણમાં પ્રવેશ આપતું નથી. જેને કારણે તેઓને પારાવાર નુકસાન થયું છે. એ જ રીતે કુંતા, વટાર અને અન્ય ગામલોકોને પણ દમણમાં પ્રવેશ આપવામાં આવતો નથી. જેને કારણે દમણની કંપનીઓમાં નોકરી કરતા કામદારો, દમણમાં બેન્ક એકાઉન્ટ ધરાવતા તેમજ અનાજ કરીયાણું અને આરોગ્યની સેવા મેળવવા માંગતા લોકોની હાલત કફોડી થઈ છે. ત્યારે, બલિઠા ગ્રામ પંચાયતે દમણ પ્રશાસન સામે પાણી બતાવી શાન ઠેકાણે લાવવાની પહેલ કરી છે. જે કદાચ આગામી દિવસોમાં અન્ય ગ્રામપંચાયત પણ બતાવશે તો દમણના લોકોને અને ઉદ્યોગોના માલવાહક વાહનોને દમણ બહાર નીકળવું મુશ્કેલ બનશે.