- સેલવાસમાં કોરોનાના 71 કેસ નોંધાયા
- વલસાડમાં 32 નવા કેસ સાથે 3 ના મોત
- દમણમાં 27 નવા કેસ સામે આવ્યા
વલસાડઃ જિલ્લામાં મંગળવારે કોરોનાના નવા 32 કેસ સામે આવ્યાં છે, તેમજ 3 દર્દીઓનો કોરોનાએ ભોગ લીધો છે. આ તરફ દાદરા નગર હવેલીમાં 71 અને દમણમાં 27 નવા કોરોના પોઝિટિવ દર્દીઓ નોંધાયા હતા.
1399 દર્દીઓ સારવાર મેળવી સ્વસ્થ થયા
વલસાડ જિલ્લામાં કોરોનાનું સંક્રમણ યથાવત રહ્યું છે. મંગળવારે જિલ્લામાં 3 કોરોના દર્દીઓના મોત નીપજ્યા હતા. તો, કોરોનાના નવા 32 પોઝિટિવ કેસ નોંધાયા હતા. વલસાડ જિલ્લામાં અત્યાર સુધીમાં કુલ 1789 દર્દીઓમાંથી 229 દર્દીઓ સારવાર હેઠળ છે. જ્યારે અત્યાર સુધીમાં કુલ 163 દર્દીઓના મોત થયા છે. તેમજ 1399 દર્દીઓ સારવાર મેળવી સ્વસ્થ થયા છે.
આ પણ વાંચોઃ ડાંગ જિલ્લામાં 5 ડિસ્ચાર્જ, 3 કોરોના પોઝિટિવ કેસ નોંધાયા
સેલવાસમાં 339 એક્ટિવ દર્દીઓ
સંઘપ્રદેશ દાદરા નગર હવેલીમાં કોરોનાના કેસમાં સતત વધારો થઈ રહ્યો છે. દાદરા નગર હવેલીમાં મંગળવારે એક જ દિવસમાં નવા 71 કોરોના પોઝિટિવ દર્દીઓ નોંધાયા હતાં. દાદરા નગર હવેલીમાં અત્યાર સુધીમાં કુલ 2178 દર્દીઓનો કોરોના રિપોર્ટ પોઝિટિવ આવ્યાં બાદ તેમાંથી 1838 દર્દીઓ સારવાર મેળવી સ્વસ્થ થયા છે. જ્યારે 339 દર્દીઓ સારવાર હેઠળ છે.
દમણમાં 210 એક્ટિવ દર્દીઓ
કેન્દ્રશાસિત પ્રદેશ દમણમાં પણ મંગળવારે વધુ 27 દર્દીઓનો રિપોર્ટ પોઝિટિવ આવ્યો હતો. જેની સામે 10 દર્દીઓને રજા આપવામાં આવી હતી. દમણમાં કુલ 1720 દર્દીઓ પૈકી 1509 દર્દીઓ ડિસ્ચાર્જ થઈ ચૂક્યા છે. જ્યારે 210 એક્ટિવ કેસ છે, જેમની હોસ્પિટલમાં સારવાર ચાલી રહી છે.
આ પણ વાંચોઃ જામનગરમાં 302 કોરોના પોઝિટિવ કેસ નોંધાયા
લોકોમાં ભયનો માહોલ
ઉલ્લેખનીય છે કે, વલસાડમાં 32 કેસ, કેન્દ્રશાસિત પ્રદેશ દાદરા નગર હવેલીમાં 71 અને દમણ 27 મળી કુલ 130 કોરોના પોઝિટિવ દર્દીઓ નોંધાતા લોકોમાં ભયનો માહોલ ફેલાયો છે.
