ધરમપુર ખાતે રીસીવિંંગ સેન્ટર પરથી 172 બુથો પર 1059 કર્મચારીઓને મતદાન મથકે રવાના કરાયા

સ્થાનિક સ્વરાજની ચૂંટણીમાં ધરમપુર તાલુકામાં 5 જિલ્લા પંચાયતની બેઠક અને 24 તાલુકા પંચાયતની બેઠક માટે ધરમપુરના લાલ ડુંગરી ખાતે આવેલી આદર્શ નિવાસી શાળામાંથી કર્મચારીઓને EVMની ફાળવણી કર્યા બાદ રવાના કરવામાં આવ્યા હતા.

• 172 બુથો માટે EVM સાથે મતદાન મથક ઉપર કર્મચારીઓને કરાયા રવાના
• ધરમપુરમાં પાંચ જિલ્લા પંચાયત અને 24 તાલુકા પંચાયત બેઠક માટે ચૂંટણી યોજાશે
• ભારે વાહનો જઈ શકે નહીં તેવા દુર્ગમ સ્થાન માટે ખાનગી વાહનો નક્કી કરાયા

વલસાડ: રવિવારના રોજ વહેલી સવારે 7 વાગ્યાથી ધરમપુરમાં જિલ્લા પંચાયત અને તાલુકા પંચાયતની ચૂંટણી માટે 172 જેટલા બુથો પરથી મતદાન થશે, જે માટે શનવારે મતદાનની પૂર્વ સંધ્યાએ ધરમપુરના લાલ ડુંગરી ખાતે બનાવવામાં આવેલા રિસિવિંંગ સેન્ટર પરથી 1059 જેટલા કર્મચારીઓને તેમના મતદાન મથકો નક્કી કરી રૂટ ઉપર રવાના કરવામાં આવ્યા હતા. જો કે, એક સાથે આટલા કર્મચારીઓ ભેગા ન થઈ શકતા હોવાથી તે માટે ચૂંટણી અધિકારી દ્વારા બે વિભાગમાં આ કામગીરી કરવામાં આવી હતી.

કર્મચારીઓને EVMની ફાળવણી કરવામાં આવી

1059 કર્મચારીઓએ પોતાના મતદાન મથક માટે EVMની ચકાસણી કરાઈ

લાલ ડુંગરી ખાતે બનાવવામાં આવેલા રીસીવિંંગ સેન્ટર આદર્શ નિવાસી શાળામાં તમામ શિક્ષકો આજે રવિવારે મતદાન મથક ઉપર ફરજ બજાવવાના છે. તે તમામ શિક્ષકોએ EVM તેમજ મતદાન મથક ઉપર આપવામાં આવતી તમામ ચીજ વસ્તુઓ મેળવી પ્રથમ ચકાસણી કરી હતી. તેમજ મશીનો પણ ચાલુ છે કે નહીં તે અંગેની પણ ખાતરી કરી લીધા બાદ તેઓ તેમના રૂટ ઉપર ઝોનલ અધિકારીને મળીને રવાના થયા હતા.

કર્મચારીઓને EVMની ફાળવણી કરવામાં આવી

નવ મતદાન મથકો માટે ખાનગી વાહનો મોકલવામાં આવ્યા

ધરમપુરના અંતરિયાળ એવા દુર્ગમ વિસ્તારમાં ઘાટ વાળા રસ્તા હોવાને કારણે અનેક ગામો દુર્ગમ વિસ્તારમાં વસ્યા છે. જેથી આવા સ્થળ ઉપર મતદાન મથક હોવાને કારણે ત્યાં મોટી ST બસો જઈ શકતી નથી, ત્યારે ફરજ ઉપર કર્મચારીઓને લઈ જવા માટે વિશેષ ખાનગી વાહનો મોકલવામાં આવ્યા છે. ધરમપુરમાં કુલ 9 જેટલા મતદાન મથક એવા છે કે જ્યાં આગળ મોટા વાહનો જઈ શકતા નથી, જેમાં ખડકી, કોરવડ, મૂરદડ, હૈદરી, પોન્ધા જંગલ, ખોબા, શિશુમાળ, રાનવેરી,અને ટાંકી ગામનો સમાવેશ થાય છે. જ્યાં ચૂંટણી ફરજ પરના કર્મચારીઓને લઈ જવા માટે ખાનગી વાહનો મૂકવામાં આવ્યા છે.

ધરમપુર રીસીવિંંગ સેન્ટર

કોરોના વાઈરસને લઈ કર્મચારીઓને કોરોના પ્રતિરોધક કીટ આપવામાં આવી

હાલમાં ધરમપુર તાલુકામાં એક પણ કોરોના પોઝિટિવ કેસ નથી. તેમ છતા ચૂંટણી દરમિયાન ફરજ બજાવતા કર્મચારીઓ કોરોના સંક્રમણ ન ફેલાય એવા હેતુથી આરોગ્ય વિભાગ દ્વારા દરેક બુથ ઉપર કર્મચારીઓ માટે વિશેષ કીટ આપવામાં આવી છે. આ કિટમાં હેન્ડ ગ્લોઝ, સેનેટાઈઝર, માસ્ક તેમજ PPE કીટનો સમાવેશ થાય છે. આમ તકેદારીના ભાગરૂપે તમામ કર્મચારીઓને કોરોના સંક્રમણ ન ફેલાય તે માટે કીટ પણ આપવામાં આવી છે

કર્મચારીઓને EVMની ફાળવણી કરવામાં આવી

ધરમપુર વહીવટી તંત્ર સંપૂર્ણપણે સજ્જ બન્યું

જિલ્લા પંચાયત અને તાલુકા પંચાયતની ચૂંટણી માટે ધરમપુર વહીવટી તંત્ર સંપૂર્ણપણે સજ્જ બન્યું છે. વહેલી સવારથી જ ચૂંટણીની પૂર્વ સંધ્યાએ તમામ કર્મચારીઓને તેમના જે તે મતદાન મથક ઉપર મોકલવા માટે EVM સહિતની સાધન સામગ્રીઓ આપીને તેમની ફરજ ઉપર રવાના કરવામાં આવ્યા હતા.