ડભોઈ નજીક ટ્રકે કારને અડફેટે લેતા અકસ્માત સર્જાયો, કોઇ જાનહાની નહિ

ડભોઇ વેગા ત્રિભેટ નજીક આવેલા રેલવે ઓવર બ્રિજ પરથી ઓવરલોડ લાકડા ભરેલી એલ.પી.ટ્રક પૂર ઝડપે આવી રહી હતી અને એક કારને અડફેટે લેતાં ટ્રક પલટી ખાઈ ગઈ હતી. સદનસીબે કોઇ જાનહાનિ થઇ ન હતી.

• ડભોઈ વેગા ત્રિભેટ નજીક રેલ્વે ઓવરબ્રિજ પર અકસ્માત સર્જ્યો
• ઓવરલોડેડ લાકડા ભરેલી ટ્રકે આગળ જતી કારને અડફેટે લીધી
• ટ્રકચાલક, ક્લીનર કેબિનમાં ફસાયા
• કાર ચાલક સહિત 3 ને સામાન્ય ઇજા પહોંચી
  
  
  વડોદરાઃ ડભોઇ વેગા ત્રિભેટ નજીક આવેલા રેલવે ઓવર બ્રિજ પરથી ઓવરલોડ લાકડા ભરેલી એલ.પી.ટ્રક પૂર ઝડપે આવી રહી હતી અને વેગા સર્કલ નજીક આગળ ચાલતી એક કારને અડફેટે લેતાં મોટા ધડાકા સાથે લાકડા નમી પડતાં ટ્રક પલટી ખાઈ ગઈ હતી. સમગ્ર બનાવમાં ટ્રક ચાલક, ક્લીનર અને કાર સવાર ડ્રાઈવરને નાની મોટી ઇજાઓ થઇ હતી. જોકે સ્થાનિક લોકો દ્વારા તમામને બહાર કાઢી નજીકના દવાખાનામાં સારવાર માટે ખસેડાયા હતા. સદનસીબે કોઇ જાનહાનિ થઇ ન હતી.
  

ટ્રક ચાલકે સ્ટેયરિંગ પરનો કાબૂ ગુમાવ્યો

ડભોઇ વેગા ત્રિભેટ નજીક આવેલા સર્કલ પાસે છોટાઉદેપુર તરફથી લાકડા ભરી આવતી એલ.પી.ટ્રકમાં ભરેલાં લાકડા નમી પડતા આગળ ચાલતી એક કારને અડફેટે લઈ ટ્રક સર્કલ નજીક જ પલ્ટી ખાઈ ગઈ હતી. આ ટ્રક રેલવે ઓવર બ્રિજ પરથી પૂર ઝડપે આવતી હોવાથી ટ્રક ચાલકે સ્ટ્રેરિંગ પર કાબૂ ગુમાવ્યો હતો જેથી અકસ્માત સર્જાયો હતો.

જાનહાની થતાં ટળી

ઓવરલોડ ભરેલા લાકડા એક તરફ નમી જતાં ટ્રક પલ્ટી ખાઈ ગઈ હતી.જ્યારે સમગ્ર બનાવમાં કાર ચાલકને હાથ અને પગના ભાગે ગંભીર ઇજાઓ થવા પામી હતી.તો ટ્રકનો ડ્રાઈવર અને ક્લીનર બંને જણા ટ્રકમાં ફસાઈ ગયા હતા.આ બનાવને પગલે સ્થાનીક દુકાનદારો અકસ્માત જોઈ દોડી આવ્યા હતા અને અડધો કલાકની ભારે જહેમત બાદ કાર ચાલક અને ટ્રકના ડ્રાઈવર તેમજ ક્લીનરને બહાર કાઢી 108 એમ્બ્યુલન્સની મદદથી નજીકના દવાખાને સારવાર માટે મોકલી આપ્યા હતા. સમગ્ર બનાવ માં મોટી કોઈ જાનહાની થવા પામી ન હતી.