વડોદરા: શહેરમાં તારીખ 20મીથી દશામાતાજીના વ્રતનો પ્રારંભ થઇ રહ્યો છે. જેને લઈને મૂર્તિકારો દ્વારા દશામાતાજીની પ્રતિમાઓ તૈયાર કરી દેવામાં આવી ગઈ છે, ત્યારે શહેરના મૂર્તિ બજાર માટે જાણીતા એવા રોકડનાથ, મંગળબજારમાં આજે મંગળવારે પાલિકાની દબાણ શાખાની ટીમ ત્રાટકી હતી અને પ્રતિમાઓનું વેચાણ કરી છૂટક રેંકડી કરતા નાના વેપારીઓના કામ ચલાઉ શેડ તોડી પાડ્યા હતાં.
આ સમગ્ર કાર્યવાહી વચ્ચે નાના વેપારીઓના જણાવ્યાં મુજબ વૈશ્વિક મહામારી કોરોનાને લઈ 4 મહિના લોકડાઉનમાં ધંધા રોજગાર પર માઠી અસર પડી હતી. ત્યારબાદ અનલોક-2માં 5થી 7 દિવસ ધંધો કરવાનો સમય મળ્યો અને તેમા પણ તંત્રએ અમારી રોજગારી છીનવી લીધી હોવાના આક્ષેપ કર્યા હતા.
ઉલ્લેખનીય છે કે વડોદરાનું આ બજાર પ્રતિમાઓના વેંચાણ માટેનું સૌથી મોટું બજાર છે. જેમાં સમગ્ર ગુજરાત અને રાજસ્થાનમાંથી અહીં મૂર્તિકારો પ્રતિમાઓનું વેચાણ કરવા આવતા હોય છે. હાલ, ચાલી રહેલી કોરોનાની મહામારીને લઈ કોરોનાનું સંક્રમણ ન વધે તે માટે પાલિકા તંત્ર દ્વારા આ કાર્યવાહી હાથ ધરી હોવાની માહિતી મળી હતી.
