ડુંગળીના ભાવ આસમાને પહોંચતા ગૃહિણીઓનું બજેટ ખોરવાયું

તાપીઃ હાલ સમગ્ર દેશ સહિત રાજ્યમાં પણ લોકો શાકભાજીના ભાવમાં અધધધ વધારો થતાં ચિંતામાં મુકાયા છે. ડુંગળીના ભાવની સાથે જ શાકભાજીના ભાવમાં વધારો થતાં ગૃહિણીઓનું બજેટ ખોરવાયું છે અને સમગ્ર દેશમાં લોકો પરેશાન બન્યા છે.

હાલ ડુંગળીની વાત કરીએ તો ડુંગળીની ખેતી મહારાષ્ટ્રના નાસિક જિલ્લાના વની, અભોણા, કરવણ, લસનગાવ, નાંદુરી તેમજ પીપલનેરમાં થતી હોય છે. જ્યાંથી ડુંગળીનું વેચાણ મોટા શહેરોના APMC માર્કેટમાં થાય છે. સુરત જિલ્લાાના સ્થાનિક શાકભાજી માર્કેટમાં ડુંગળી તેમજ અન્ય લીલા શાકભાજીના ભાવ બમણા થવા પામ્યા છે. ખાસ કરીને ડુંગળી કે, જે 20 રૂપિયે કિલો વહેંચાતી હતી જે ભાવ વધીને હાલ 80 રૂપિયે કિલો પર પહોંચી છે. જેના કારણે વેચાણમાં પણ 50 ટકાથી વધુનો ઘટાડો થયો છે.

શાકભાજીના ભાવઃ

શાકભાજી	ભાવ (પહેલા)	ભાવ (હાલ)
ડુંગળી	20રૂપિયા	80રૂપિયા
રીંગણ	60રૂપિયા	100રૂપિયા
લસણ	140રૂપિયા	200રૂપિયા
તુવેર	80રૂપિયા	160રૂપિયા
લીલા ધાણા	50રૂપિયા	120રૂપિયા
પાપડી	50રૂપિયા	90રૂપિયા
ફણસી	40રૂપિયા	90 રૂપિયા
વટાણા	80રૂપિયા	160રૂપિયા
લીલું લસણ	160રૂપિયા	240રૂપિયા
લીલા મરચા	20રૂપિયા	50રૂપિયા
લીંબુ	80રૂપિયા	130 રૂપિયા

શાકભાજીઓમાં ગરીબોની કસ્તુરી કહેવાતી ડુંગળીના ભાવ આજે ગરીબોને રડાવી રહ્યા છે. મધ્યમ પરિવારની ગૃહિણીઓ કે જેમને આજે શાકભાજીના ભાવો બમણા થતાં પોસાતા નથી તો સામાન્ય ગરીબ પરિવાર ક્યાંથી શાકભાજી ખાઇ શકે અને તેથી જ હાલ લોકો લીલા શાકભાજીને બદલે કઠોળ તરફ વળ્યા છે. એટલું જ નહીં વેપારીઓથી લઇને સામાન્ય લોકો શાકભાજીના ભાવ ઘટે તેની રાહ જોઇ રહ્યાં છે.