સુરતમાં રૂપિયા 2 લાખના ચરસની ડિલિવરી કરવા આવેલા રાજસ્થાનના બે આરોપીની ધરપકડ

સુરતમાં ફરી એક વખત ચરસ ઝડપાયું છે. પૂણા પોલીસે કુંભારિયા ગામ પાસેથી રઘુવીર સિલિયમ સામેથી આ ચરસ ઝડપ્યું હતું. રાજસ્થાનના જોધપુરના બે આરોપીઓ 427 ગ્રામ ચરસની ડિલિવરી કરવા સુરત આવ્યા હતા. ત્યારે પોલીસે ચરસ લઈને આવતા બે આરોપી અને ચરસ લેનારા એક આરોપીની ધરપકડ કરી હતી. જ્યારે પોલીસે અન્ય ત્રણ આરોપીઓને વોન્ટેડ જાહેર કર્યા છે.

• સુરત પોલીસે 472 ગ્રામ ચરસ સાથે ત્રણ આરોપીને ઝડપ્યા
• કુંભારિયા ગામમાં આરોપીઓ ચરસની ડિલિવરી માટે આવ્યા હતા
• પોલીસે ચરસ લાવનાર અને મગાવનારા ત્રણને ઝડપી લીઘા

સુરતઃ પોલીસને બાતમી મળી હતી કે, કુંભારિયા ગામ વિસ્તારમાં રઘુવીર સિલિયમ પાસે બે લોકો ચરસ વેચવા આવવાના છે. આથી પોલીસે સાંજે અહીં વોચ ગોઠવી હતી. તે દરમિયાન આરોપીઓ અહીં આવતા પોલીસે તેમની ધરપકડ કરી લીધી હતી. સ્થળ પરથી ચરસ સાથે આરોપી લાડુનાથ કાળુનાથ નાથ, પ્રકાશ ઉર્ફ સૂરજ નરસિંહરામ જાજડને 472 ગ્રામ ચરસ સાથે ઝડપી લીધો હતા. આ બન્ને આરોપી રાજસ્થાનના જોધપુરાથી સુરત ચરસની ડિલિવરી કરવા આવ્યા હતા. તેમની પાસેથી ચરસ લેવા આવેલા આરોપી જિગ્નેશ હરિશ ઠાકુરને પણ ઝડપી લીધો છે.

પોલીસે ચરસ મગાવનારા આરોપીને વોન્ટેડ જાહેર કર્યો

પોલીસે આરોપીઓ પાસેથી ત્રણ ફોન અને એક મોપેડ પણ કબજે કર્યું છે. ઝડપાયેલા ચરસની કિંમત રૂપિયા 2.36 લાખ છે. પોલીસે ચરસ મોકલનાર ગણેશનાથ અને ચરસ મંગાવનાર મિતેશ સુનિલ પાંડેને વોન્ટેડ જાહેર કર્યો છે. આરોપી ગણેશનાથે આરોપી નોલારામ પાસેથી ચરસ મેળવીને મિતેશને આપવાનો હતો. આ ચરસ મિતેશને આપવા માટે લાડુનાથને જોધપુરથી મોકલ્યો હતો. હાલ પોલીસે આ મામલે વધુ તપાસ હાથ ધરી છે.