સુરતઃ જિલ્લામાં લોકડાઉનના પગલે ધંધા રોજગારો બંધ થઈ જતા શ્રમિક તેમજ પરપ્રાંતના લોકો પોતાના વતન તરફ વળી રહ્યા છે. અન્ય લોકોને કોરોનાનો ચેપ ન લાગે તે માટે સરકારે હિજરત કરતા લોકોને અટકાવવા પોલીસને સ્પષ્ટ નિર્દેશ આપી દીધા છે.
જેને લઈ પાંડેસરાના ગણેશ નગર ખાતેથી કેટલાક લોકો પોતાના વતન તરફ જવા નીકળ્યા હતા. જે સમયે પોલીસ દ્વારા આ ગામડા તરફ જતા લોકોને અટકાવવા જતા મામલો તંગ બનતા પોલીસ પર પથ્થરમારો કરવામાં આવ્યો હતો.
જ્યારે પોલીસના ઉચ્ચ અધિકારીઓની ગાડીના કાફલા પર પણ પથ્થરમારો કરાતા વાહનોમાં ભારે નુકશાન થયું હતું. ઘટના બાદ પોલીસે સ્થિતિને કાબુમાં લઈ કેટલાક લોકોની અટકાયત કરી હતી. તે દરમિયાન સુરત પોલીસ કમિશ્નર આર.બી.બ્રહ્મભટ્ટે ઘટનાની ગંભીરતા જોઈ જાતે સ્થળ મુલાકાત કરી હતી.
બીજી તરફ ઘટનાના પગલે સમગ્ર વિસ્તારમાં પોલીસ દ્વારા કોમ્બિનગ વધારી દેવામાં આવ્યું હતું. રેપીડ એક્શન ફોર્સ તેમજ એસઆરપીની સાથે સ્થાનિક પોલીસના જવાનોને પણ તૈનાત કરી દેવામાં આવ્યા હતા.
