ચીનથી આવતા મશીન પર પણ સરકાર પ્રતિબંધ મૂકે: ફોગવા

ટિકટોક સહિત 59 ચાઈનીઝ એપ્લિકેશન પર પ્રતિબંધ મૂકતા સુરતના વીવર્સ એસોસિએશને માંગ કરી છે કે, એપની જેમ જ ચીનથી આવતા મશીન ઉપર પણ સરકાર દ્વારા પ્રતિબંધ મૂકવામાં આવે.

સુરતઃ ભારત સરકારે ટિકટોક સહિત 59 એપ્લિકેશન પર પ્રતિબંધ મુકતા દેશભરમાંથી અનેક પ્રતિક્રિયાઓ આવી રહી છે. આ વચ્ચે સાઉથ ગુજરાત વિવર્સ એસોસિએશનના પ્રમુખે સરકાર પાસે અપીલ કરી છે કે, ચીનથી આવતા મશીનો ઉપર પણ સરકાર પ્રતિબંધ લાદવામાં આવે.

વિશ્વભરમાં સુરતનો ટેક્સટાઈલ ઉદ્યોગ પ્રખ્યાત છે, પરંતુ વિવિધ ઉદ્યોગોમાં જે મશીન સુરત સહિત દેશના અનેક શહેરોમાં વાપરવામાં આવે છે તે મોટાભાગે ચીનથી મંગાવવામાં આવે છે. ત્યારે હવે હાલ જે સરહદ પર સ્થિતિ ઊભી થઈ છે તેને ધ્યાનમાં રાખી અનેક નિર્ણયો સરકાર દ્વારા લેવામાં આવી રહ્યા છે અને ચીની વસ્તુઓનો બહિષ્કાર કરવામાં આવી રહ્યો છે.

સરકારે ટિકટોક સહિત 59 ચાઈનીઝ એપ્લિકેશન પર પ્રતિબંધ મૂકતા સુરતના વિવર્સ એસોસિએશને માંગ કરી છે કે, એપની જેમ જ ચીનથી આવતા મશીન ઉપર પણ સરકાર દ્વારા પ્રતિબંધ મૂકવામાં આવે.

આ અંગે સાઉથ ગુજરાત વિવર્સ એસોસિયેશનના પ્રમુખ અશોક જીરાવાળાએ જણાવ્યું હતું કે, જે રીતે ચાઈનીઝ એપ ઉપર પ્રતિબંધ મૂકવામાં આવ્યા છે. તે જ રીતે દેશના વેપારીઓને આત્મનિર્ભર બનાવવા માટે એનાથી આવતાં ઇન્ડસ્ટ્રીના મશીન ઉપર પણ પ્રતિબંધ સરકાર લગાવે.