સુરતના કાપડ દલાલને રૂપ સુંદરી સાથે મિત્રતા કેળવવી પડી ભારે

સુરતઃ કતારગામ વિસ્તારમાં રહેતા કાપડ દલાલને રૂપસુંદરી સાથે મિત્રતા કેળવવી ભારે પડી હતી. યુવતીએ કાપડ દલાલને ફોન કરી પોતાના ઘરે બોલાવ્યો હતો. બાદમાં બંધ રૂમમાં લઈ જઈ શરીર સબંધ બાંધતા પોલીસના સ્વાંગમાં આવી ચઢેલ ઈસમોએ કાપડ દલાલને ધાક ધમકી આપી રૂપિયા ત્રણ લાખની માંગણી કરી હતી. જ્યાં ઘબરાયેલા કાપડ દલાલે રૂપિયા અઢાર હજાર આપ્યા બાદ પોલિસ ફરીયાદ કરતા એક આરોપીની પોલીસે ધરપકડ કરી છે. જ્યારે યુવતી સહિત ચાર લોકોના નામ ખુલતા પોલીસે તમામને વોન્ટેડ જાહેર કર્યા છે.

કતારગામ વિસ્તારમાં રહેતા કાપડ દલાલ સુરેશભાઇ પ્રજાપતિ બે દિવસ અગાઉ વરાછાના બોમ્બે માર્કેટ ખાતે કામ અર્થે ગયા હતા. જે દરમિયાન અહીં દિવ્યા નામની યુવતી સાથે તેમનો પરિચય થયો હતો. દિવ્યા નામની યુવતીએ પોતાનો મોબાઇલ નંબર આપી સુરેશભાઈનો પણ મોબાઈલ નંબર લઈ લીધો હતો. બાદમાં દિવ્યા નામની આ રૂપ સુંદરીએ પોતાની મીઠી મીઠી વાતોમાં સુરેશભાઈને ભોળવી પોતાના ઘરે બોલાવ્યા હતાં.

પુનાગામ ખાતે પોતાના ઘરે બોલાવ્યા બાદ બંધ રૂમમાં લઈ જઈ સુરેશભાઈને શરીર સબંધ બાંધવા નિર્વસ્ત્ર કરાવ્યા હતાં. થોડી જ ક્ષણોમાં યુવતીના સાગરીતો પોલીસનો સ્વાંગ રચી આવ્યા હતા. ત્રણથી વધુ ઇસમો ઘરમાં ઘુસી ગયા હતા અને કાપડ દલાલને બ્લેકમેલ કરી રૂપિયા ત્રણ લાખની માગ કરી હતી. આ સાથે જ ધાકધમકી આપી કાપડ દલાલને માર પણ માર્યો હતો. જે બાદ પોતાની પાસે રહેલ અઢાર હજાર જેટલી રોકડ રકમ આપી કાપડ દલાલે પોતાનો છુટકારો કરાવ્યો હતો. જ્યાં ચુંગાલમાંથી છૂટયા બાદ કાપડ દલાલ સુરેશભાઈ પ્રજાપતિએ પુના પોલીસ મથકમાં ફરિયાદ આપતા પોલીસે ગુનો નોંધી આગળની તપાસ શરૂ કરી હતી.

પોલીસની તપાસમાં જાણવા મળ્યું હતું કે દિવ્યા નામની યુવતીએ પોતાના સાગરીતો સાથે મળી હનીટ્રેપ ગોઠવી હતી. જે બાદ કાપડ દલાલને પોતાની જાળમાં ફસાવી રૂપિયા પડાવવાનો પ્લાન બનાવ્યો હતો. ભોગ બનનારની ફરિયાદના આધારે પોલીસે ફરીયાદ નોંધી પરસોત્તમ સોલંકી નામના આરોપીની ધરપકડ કરી હતી. જ્યારે અમિત મશરૂ, શિવરાજસિંહ, અલ્પેશ પટેલ અને દિવ્યા નામની યુવતીને વોન્ટેડ જાહેર કરી હતી.

આરોપીઓ છેલ્લા કેટલાક સમયથી આ પ્રકારે લોકોને ફસાવી રૂપિયા પડાવતા આવ્યા હતાં. આ અંગેની તપાસ પુણા પોલીસે હાથ ધરી છે. એટલું જ નહીં ફરાર આરોપીઓને ઝડપી પાડવા પણ પોલિસે કવાયત હાથ ધરી છે. પોલીસ તપાસ બાદ અન્ય ગુનાઓ પરથી પડદો ઉચકાય તેવી શકયતા પણ હાલ રહેલી છે.