હિંમતનગર: તાલુકાના સાકરોડીયામાં એક અનોખી રીતે લગ્ન કરવામાં આવ્યાં છે. જેમાં વર છે જર્મનીનો અને કન્યા છે રશિયાની જ્યારે જાનૈયા છે ગુજરાતી. બે અલગ અલગ દેશના લોકોએ આજે સોમવારના ભારતીય ધાર્મિક વિધિ-વિધાનોથી (Indian Rituals) લગ્નના તાંતણે જોડાયા છે. મૂળ જર્મનીના બિઝનેસમેનના પુત્ર ક્રીશ મુલર અને રશિયાની શિક્ષક જુલિયા ઉખવાકટીનાને ભારતના આધ્યાત્મથી આકર્ષેલા અને આ જ અધ્યાત્મ આજે તેમનાં મંગલ પરિણયમાં પરિણમ્યું અને તેમની હિંદુ વિધિથી લગ્ન (Marriage according to Hindu rites) કરવાની ઇચ્છા પણ થઇ ફળીભૂત. અહી એમને પીઠી પણ ચોળાઈ લગ્ન ગીત પણ ગવાયા અને કન્યાદાન પણ દેવાયું હતું.
જુલિયા અને ક્રીશ બંને અધ્યાત્ત્મની શોધમાં નીકળ્યાં હતાં
જુલિયા અને ક્રીશ બંને અધ્યાત્ત્મની શોધમાં છે અને તેઓ દાદા ભગવાનથી આકર્ષાયેલા છે. આ આકર્ષણ તેમને સાકરોડીયા ગામમાં ખેંચી લાવ્યું અને તેમના મિત્રને હિંદુ ધાર્મિક વિધિથી લગ્ન કરવાની ઈચ્છા વ્યક્ત કરી હતી અને તુરંતજ કંકુના કરવામાં આવ્યાં હતાં. તાત્કાલિક કંકોત્રીઓ છપાઈ તેમજ કન્યા અને વર પક્ષનું સ્થાન એમના મિત્રના પરિવારજનોએ લીધું હતું અને લગ્ન સારી રીતે સંપન્ન થયા હતાં. નવદંપતીએ સંસ્કૃતિનાં ભર પેટ વખાણ કર્યા હતાં.
સ્થાનિકો ઉમટયા લગ્ન જોવા
ભારતીય સંસ્કૃતિ (Indian culture) પ્રમાણે લગ્ન થતા હોય, ત્યારે મોટાભાગે વર કન્યાના પરિવારજનો મોટી સંખ્યામાં હાજર રહેતા હોય છે તેમજ લગ્નની મજા માણતા હોય છે. જોકે વિદેશી નવવધુને પણ જોવા આસપાસથી મોટી સંખ્યામાં લોકો હાજર રહ્યા હતા અને લોકોને હાજર જોઈને વિદેશી યુગલ પણ રોમાંચિત થઇ ઉઠ્યું હતું.
જર્મનીનો વર, રશિયાની કન્યા અને ગુજરાતીઓ જાનૈયા તરીકે
સાંભળીને કદાચ નવાઇ લાગે, પરંતુ હિંમતનગરના સાકરોડીયા ગામે છેલ્લા કેટલાક સમયથી જર્મનીમાં એન.આર.આઈ તરીકે રહેતા લાલાભાઇના પુત્ર સાથે ક્રિશ મુલરની મિત્રતાના પગલે આ લગ્ન સાબરકાંઠાના સાકરોડીયામાં સંભવ બન્યું હતું. આ વિદેશી નવયુગલને પોતાના લગ્ન ભારતીય સંસ્કૃતિ અનુસાર થાય તેવી પ્રબળ ઇરછાના પગલે અન્ય ધર્મ હોવા છતાં હિન્દુ ધર્મ વિધિ અને ભારતીય સંસ્કૃતિ અનુસાર લગ્ન કર્યા છે, ત્યારે નવદંપતી ભલે વિદેશી હોય, પરંતુ નાનકડા ગામમાં લગ્ન થયાના પગલે જાનૈયાઓ તેમજ પરિવારજનો સ્થાનિકો બન્યા છે તેનું ગૌરવ.
વિદેશીઓ ભારતીય સંસ્કૃતિ અને હિંદુ ધર્મને આદર આપી ગૌરવ વધાર્યું
ભારતીય સંસ્કૃતિ, હિંદુ ધર્મ આજે પણ વિદેશીઓને પ્રભાવિત કરી રહી છે, ત્યારે હાલમાં ભલે બની બેઠેલા સંત્તો ધર્માંતરણની વાતો કરે પણ જેણે હિંદુ ધર્મને તેના મૂળમાંથી જાણ્યો છે, એવા જુલિયા અને ક્રીશ જેવા યુવાનો-યુવતીઓ ભલે હિંદુ ન હોવા છતાં ભારતીય સંસ્કૃતિ અને હિંદુ ધર્મને આદર આપી ગૌરવ વધારી રહ્યા છે તે ખાસ બાબત છે.
આ પણ વાંચો: છોકરીઓના લગ્નની ઉંમર 18થી વધારીને 21 વર્ષ કરશે સરકાર
