સાબરકાંઠાઃ જિલ્લાના ઇડરમાં આવેલા ફિંચોડ ગામના યુવકને ફેસબુક મારફતે ઇડરની સ્થાનિક યુવતીએ કોન્ટેક કરી મિત્રતા કેળવી હતી. મિત્રતા બાદ યુવતીએ વિજયનગર પાસે રૂબરૂ મુલાકાત માટે યુવકને બોલાવ્યો હતો. ત્યારબાદ સાંજના સમયે અન્ય મોબાઈલ નંબર પરથી યુવતીએ યુવકના પિતાને ફોન કરીને દુષ્કર્મ અંગે ફોન કર્યો હતો. આ ઉપરાંત દુષ્કર્મના મામલે ફરિયાદ ન કરવા માટે રૂપિયા 10 લાખની માગણી કરી હતી.
આ અંગે યુવકના પિતા અને પુત્રએ ઇડર પોલીસ મથકમાં ફરિયાદ દાખલ કરતાં પોલીસે આ મામલે 3 આરોપીની અટકાયત કરી છે. આ ઉપરાંત હાલમાં હનીટ્રેપ મામલે સમગ્ર કારસ્તાન આચરનારા તત્વો સામે કાયદેસરની તપાસ હાથ ધરી છે અને હનીટ્રેપ મામલે તમામ આરોપીઓની અટકાયત કરવા પોલીસે ચક્રો ગતિમાન કર્યા છે.
મળતી માહિતી પ્રમાણે, ઇડર તેમજ આસપાસના વિસ્તારોમાં 20થી વધુ વખત આ ગેંગ દ્વારા હનીટ્રેપના પગલે લાખો રૂપિયા ખંખેર્યા છે.
