રાજકોટ: રાજકોટની ભાગોળે આવેલા કણકોટ ગામ નજીક મફતીયા પરામાં રહેતા માલદેભાઇ કરસનભાઈ પાંડાવદરા નામના આધેડ પર તેના જ જમાઈ દ્વારા કાર ચલાવીને હત્યાનો પ્રયાસ કરવામાં આવ્યો હતો. જોકે આ ઘટનામાં માલદેભાઈ હેમખેમ બચી ગયા હતા પરંતુ તેમને ઇજાઓ થતા તાત્કાલિક રાજકોટ સિવિલ હોસ્પિટલમાં સારવાર અર્થે ખસેડ્યા હતા. જમાઈ દ્વારા સસરા ઉપર કાર ચલાવવાની ઘટનાના સીસીટીવી વિડીયો પણ સામે આવ્યા છે. જેના આધારે રાજકોટ તાલુકા પોલીસ દ્વારા વધુ તપાસ શરૂ કરવામાં આવી છે. આ મામલે પોલીસે જમાઈ સહિત ચાર લોકો વિરોધ ગુનો નોંધી તેમને શોધખોળ હાથ ધરી છે.
શું બની ઘટના?: સમગ્ર ઘટનાની વાત કરવામાં આવે તો કણકોટ ગામે રહેતા માલદેભાઈ કરસનભાઈ પાંડાવદરાની દીકરી જામનગર સાસરે છે. જામનગરમાં દીકરીને જમાઈ સાથે માથાકૂટ થઈ હોય તેને લઈને છેલ્લા પાંચ મહિનાથી તે પોતાના બે સંતાનો સાથે પિતાના ઘરે કણકોટ ગામે રહેતી હતી. ગત તારીખ 8ના રોજ માલદેભાઈનો જમાઈ હિતેશ ચાવડા સહિત તેના ચાર જેટલા મિત્રો કણકોટ ખાતે આવ્યા હતા. તેમજ પુત્રી પાસે રહેલા સંતાનોને છીનવી લઈને જમાઈ દ્વારા દીકરી સહિતના લોકોને માર કરવામાં આવ્યો હતો અને માથાકૂટ કરવામાં આવી હતી. આ માથાકૂટ રોકવા જતા હિતેશના સસરા એવા માલદે ભાઈ પર જમાઈ હિતેશ ચાવડાએ કાર ચડાવી હતી. તેઓ કાર નીચે સૂઈ જતા તેમને માત્ર ઈજાઓ થઈ હતી.
આવેશમાં સસરા પર ચઢાવી કાર: પોલીસની પ્રાથમિક તપાસમાં સામે આવ્યું છે કે પતિ પત્ની વચ્ચે ઝઘડો થતા પત્ની રાજકોટ ખાતે પિતાના ઘરે આવી હતી. પોતાના બંને સંતાનોને લઈને પત્ની આવતા તેનો પતિ રોષે ભરાયો હતો અને સંતાનો લેવા માટે તે રાજકોટ દોડી આવ્યો હતો. રાજકોટમાં સસરાના ઘરે રહેલ પત્ની અને તેની બહેન સહિતના લોકોને લાકડી વડે માર માર્યો હતો અને પોતાના સંતાનોને કારમાં લઈને ભાગવાની તૈયારી કરતો હતો તે દરમિયાન હિતેશના સસરા વચ્ચે આવતા તેમની ઉપર કાર ચડાવવામાં આવી હતી.
પોલીસ સ્ટેશનમાં ગુનો નોંધાયો: સદનસીબે આ ઘટનામાં કોઈ મોટી જાનહાની સર્જાઈ નહોતી પરંતુ સસરાને ઇજાઓ થતા તાત્કાલિક તેમને રાજકોટ સિવિલ હોસ્પિટલમાં સારવાર અર્થે ખસેડવામાં આવ્યા હતા. હાલમાં મામલે વધુ તપાસ શરૂ કરવામાં આવી છે. બીજી તરફ પતિ સહિત ચાર લોકો વિરુદ્ધ તાલુકા પોલીસ સ્ટેશનમાં ગુનો નોંધાયો છે. તેમજ પોલીસ દ્વારા આરોપીઓની પણ શોધખોળ હાથ ધરાઇ છે.
