રાજકોટઃ હાલ સમગ્ર ભારતમાં કોરોના વાઈરસની મહામારીના કારણે લોકડાઉન જાહેર કરવામાં આવ્યું છે. જેને લઈને ભારતમાં જ્યાં કોરોનાના કેસ વધુ આવ્યા છે. તે વિસ્તારોને રેડઝોન જાહેર કરવામાં આવ્યું છે, ત્યારે લોકડાઉનના કારણે મોટાભાગના ઉદ્યોગ ધંધા બંધ છે. જેને લઈને રોજનું કમાઈને રોજે ખાતા લોકો માટે મુશ્કેલી ઉભી થઇ છે.
ભારતભરના અલગ અલગ રાજ્યમાં કામ કરવા ગયેલા પરપ્રાંતિયો અને શ્રમિકો જેતે વિસ્તારમાં કામધંધા ચાલુ ન હોવાના કારણે ફસાયા છે. તેમની પાસે પૈસા ન હોવાના કારણે ખૂબ જ મુશ્કેલીમાં મૂકાયા છે. જ્યારે સરકાર દ્વારા પોતાના વતનમાં જવા માટે ઇચ્છુક પરપ્રાંતિયો અને શ્રમિકોને ઓનલાઈન રજીસ્ટ્રેશન કરાવીને પાસ મેળવીને પોતાના વતનમાં સ્પેશિયલ ટ્રેન મારફતે મોકલવામાં આવી રહ્યા છે. ત્યારે રાજકોટમાં પણ મોટાભાગના પરપ્રાંતિયો પોતાના વતન જવા ઇચ્છુક છે. પરંતુ તેમને ઓનલાઈન અરજી કરતા ન આવડતી હોવાના કારણે હાલ તેઓ ફોર્મ ભરી શકતા નથી. જેને લઈને પરપ્રાંતિયોને રજિસ્ટ્રેશન માટે ફોર્મ ભરવામાં મુશ્કેલી સર્જાય ન સર્જાય અને ફોર્મ ભરવા માટે મદદ મળી રહે તે માટે રાજકોટ પોલીસ આગળ આવી છે. તેમના માટે એક વોટ્સએપ નંબર જાહેર કરવામાં આવ્યો છે, એટલે રાજકોટમાં કોઇપણ પરપ્રાંતિય 9033159011 નંબર પર વોટ્સએપ દ્વારા માહિતી મેળવી શકશે.
પરપ્રાંતીય મજરોના નામ, ક્યાં રહેછે, અને ક્યાં જવા માંગે છે તે તમામ માહિતી માટે આ વોટ્સએપ નંબર જાહેર કરવામાં આવ્યો છે. જેમાં બધીજ માહિતીની એન્ટ્રી કરી શકાશે. જેથી પરપ્રાંતીય મજૂરોને પોતાની માહિતી આપવા લાઈનોમાં ઉભું ના રહેવું પડે અને તેમના વતન જવામાં સરળતા થઈ શકે તે માટે આ પ્રયાસ કરવામાં આવ્યો છે.
આ સાથે જ તમામ પરપ્રાંતીય મજૂરોને જ્યાં સુધી પોલીસ સ્ટેશનથી ફોન આવે નહિ ત્યાં સુધી તેઓએ આવવાનું નથી. જયારે પોલીસ સ્ટેશન ઉપરથી ફોન આવે ત્યારેજ જણાવેલી જગ્યાએ સમયસર પહોંચવાનું રહેશે,જેનું રજીસ્ટ્રેશન થયેલું હશે અને ફોન આવેલ હશે તેમને જ બોલાવેલી જગ્યાએ જવાનું રહેશે.
