રાજકોટઃ ધોરાજી શહેરમાં અનેક લોક સમસ્યાઓ ઘણા લાંબા સમયથી જનતાને કનડી રહી છે. આ સમસ્યાઓની ફરિયાદો ઉચ્ચ કક્ષાએ વારંવાર થઈ છે. તેથી રાજકોટ જિલ્લા કલેક્ટરે રૂબરુ ધોરાજી શહેરની મુલાકાત કરી હતી. કલેક્ટરે ધોરાજી સેવા સદનમાં આ સમસ્યાઓ સંદર્ભે બેઠક કરી હતી. બેઠક બાદ બે દિવસની અંદર સમસ્યા નિવારણની કાર્યવાહી શરૂ થઈ જશે તેવું આશ્વાસન જનતાને અપાયું છે.
ધોરાજીની સમસ્યાઓઃ શહેરની મુખ્ય લોક સમસ્યાઓમાં પીવાનું પાણી, રસ્તા, ગંદકી અને ગટર જેવી જીવન જરૂરિયાતની સમસ્યાનો સમાવેશ થાય છે. આ ઉપરાંત જમીન નામે કરાવવામાં નવી શરત અને જૂની શરતની સમસ્યાઓ પણ ધોરાજીના ખેડૂતો અને સ્થાનિકોને નડી રહી છે. આ તમામ સમસ્યાઓની રજૂઆત, ઉકેલ અને કાર્યવાહી માટે રાજકોટ જિલ્લા કલેક્ટરે ધોરાજીમાં જ બેઠકનું આયોજન કર્યુ હતું.
સત્વરે નિવારણનું આશ્વાસનઃ ધોરાજી સેવા સદનમાં રાજકોટ જિલ્લા કલેકટર પ્રભાવ જોશીએ બેઠક યોજી હતી. આ બેઠકમાં સ્થાનિક આગેવાન, અગ્રણી અધિકારીઓ, વિનુ માથુકિયા(ભાજપ), દિનેશભાઈ વોરા(કૉંગ્રેસ) વગેરેએ ભાગ લીધો હતો. આગેવાનોએ કલેક્ટરને દરેક સમસ્યા વર્ણવી, તેના ઉકેલ જણાવ્યા અને જનતાને પડતી હાલાકી વિશે માહિતગાર કર્યા હતા. જિલ્લા કલેક્ટર પ્રભાવ જોષી દરેક સમસ્યાના ઉકેલની કાર્યવાહી બે દિવસમાં શરૂ થઈ જવાની હૈયાધારણ આપી છે.
લોકોને નડતી સમસ્યાઓના ઉકેલ માટે આર એન્ડ બી ડીપાર્ટમેન્ટ અને નગર પાલિકા વચ્ચે સંકલન કરાવવામાં આવ્યું છે. રોડ અને ગંદકીની સમસ્યા તાત્કાલિક નિવારવા નગર પાલિકાને સૂચના આપી દેવાઈ છે. ધોરાજીની મોટા ભાગની સમસ્યાના ઉકેલની કાર્યવાહી બે દિવસમાં શરૂ થઈ જશે...પ્રભાવ જોષી (જિલ્લા કલેક્ટર, રાજકોટ)
