રાજકોટ : આગામી દિવસોમાં ગણેશ મહોત્સવનો તહેવાર યોજાનાર છે. હવે આ મહોત્સવને એક થી દોઢ મહિના જેટલો સમય બાકી છે. એવામાં રાજકોટ પોલીસ કમિશનર દ્વારા ગણેશ મહોત્સવને ધ્યાનમાં રાખીને એક જાહેરનામું બહાર પાડવામાં આવ્યું છે. જેમાં પોલીસ કમિશનરે શહેરમાં મોટા ગણેશ મહોત્સવનું આયોજન કરતા આયોજકોને ગણેશજીની મૂર્તિ નવ ફૂટની રાખવાનું કહેવામાં આવ્યું છે. આ સાથે જ મૂર્તિ પ્લાસ્ટર ઓફ પેરિસની ના હોવી જોઈએ તેવું પણ જણાવાયું છે. જ્યારે ગણેશ મહોત્સવના આયોજન સ્થળે પણ સીસીટીવી કેમેરા અને પૂરતા પ્રમાણમાં સિક્યુરિટી ગાર્ડ હોવા જોઈએ.
ગણેશોત્સવ અંગે જાહેરનામું : રાજકોટ પોલીસ કમિશનરના જાહેરનામા મામલે રાજકોટ ક્રાઈમ બ્રાન્ચના ડીસીપી પાર્થરાજસિંહ ગોહિલે માહિતી આપી હતી. તેઓએ જણાવ્યું હતું કે, આગામી સપ્ટેમ્બર મહિનામાં રાજકોટમાં ગણેશ મહોત્સવનું વિશાળ આયોજન કરવામાં આવનાર છે. રાજકોટ પોલીસ કમિશનર રાજુ ભાર્ગવ દ્વારા રાજકોટમાં ગણેશ મહોત્સવના આયોજકો અને માટીની મૂર્તિ બનાવનાર મૂર્તિકારો સાથે એક બેઠક યોજવામાં આવી હતી. સુપ્રીમ કોર્ટની ગાઈડ લાઈન પ્રમાણે વખતો વખત જાહેરનામું બહાર પાડવામાં આવે છે. જ્યારે આ બેઠકમાં તેની સમજ આયોજકો અને મૂર્તિકારોને આપવામાં આવી હતી.
મૂર્તિના ઓર્ડર : પોલીસ કમિશનર દ્વારા જાહેરમાં કરવામાં આવેલ જાહેરનામાંની અંદર આ તમામ બાબતોનો ઉલ્લેખ કરવામાં આવ્યો છે. પોલીસ કમિશનર દ્વારા હવે જાહેરનામું બહાર પાડવામાં આવ્યું છે. પરંતુ આયોજનકર્તાઓ અગાઉ જ મૂર્તિના ઓર્ડર આપી દીધા છે. જેને લઇને થોડી અસમંજસતા સર્જાઈ હતી. ઉલ્લેખનીય છે કે, રાજકોટમાં નાના મોટા થઈને અંદાજિત 10,000 કરતા વધુ ગણેશ મહોત્સવનું આયોજન કરવામાં આવતું હોય છે.
આ બેઠકમાં તમામ લોકોને પોલીસ કમિશનર દ્વારા વિનંતી કરવામાં આવી હતી કે, ગણેશ મહોત્સવની જે મૂર્તિ બને તે માટેની મૂર્તિ બનાવવામાં આવે. આ મૂર્તિ બનાવવામાં કેમિકલ કલરના બદલે નેચરલ કલરનો ઉપયોગ થાય. મૂર્તિને નવ ફૂટથી વધુ ઊંચી રાખવામાં ન આવે આ પ્રમાણેનું જાહેરનામું બહાર પાડવામાં આવ્યું છે.-- પાર્થરાજસિંહ ગોહિલ (DCP, ક્રાઈમ બ્રાન્ચ)
આયોજકો સાથે બેઠક : સમગ્ર મામલે રાજકોટમાં ગણેશ મહોત્સવનું આયોજન કરતા જિમ્મી અડવાણીએ પ્રતિભાવ આપ્યો હતો. તેઓએ જણાવ્યું હતું કે, આ વર્ષે રાજ્યમાં સારો વરસાદ થયો છે. વરસાદ બાદ પ્રથમ મહોત્સવ એવો ગણેશ મહોત્સવ આવનાર છે. જે અંગે ગઈકાલે રાજકોટ પોલીસ કમિશનર દ્વારા અલગ અલગ ગણેશ મહોત્સવનું આયોજન કરતા 10 મોટા આયોજકો સાથે બેઠક યોજવામાં આવી હતી. જેમાં તેમણે કેટલાક સૂચનો કર્યા હતા.
આયોજકોમાં ચિંતા : જેમાં 9 ફૂટથી વધુની મૂર્તિ ગણેશજી ના હોવી જોઈએ તેવું પણ કહેવામાં આવ્યું છે. આ સાથે જ પ્લાસ્ટર ઓફ પેરિસની મૂર્તિ ના હોવી જોઈએ. આ તમામ સૂચનાઓ આપવામાં આવી છે. જ્યારે પોલીસ કમિશનર દ્વારા આ જાહેરનામું ગઈકાલે બહાર પાડવામાં આવેલ છે. પરંતુ મોટા ગણેશ મહોત્સવનું આયોજન કરતા આયોજકો ત્રણ મહિના અગાઉ જ ગણેશજીની મૂર્તિના ઓર્ડર આપી દેતા હોય છે. જ્યારે આ જાહેરનામાંને લઈને ગણેશ મહોત્સવના આયોજકોમાં ચિંતા જોવા મળી રહી છે.
