જેતપુરના જેતલસર ગામના ખેડૂતોને પાણીને લીધે છેલ્લાં 7 મહિનાથી પોતાના ખેતરે જવામાં મુશ્કેલી

જેતપુર તાલુકા જેતલસર ગામના ખેડૂતોને છેલ્લાં 7 મહિનાથી પોતાના ખેતરે જવામાં મુશ્કેલી થઇ રહી છે. જેતલસરથી ખેતરે જવાના માર્ગ પર હજુ પણ પાણી ભરાયેલા હોવાથી ખેડૂતોને ખેતરે જવા આવવામાં મુશ્કેલીનો સામનો કરવો પડે છે. રાજા શાહી સમયથી આ પ્રશ્ન જેમનો તેમ છે, છતાં તંત્ર મૌન છે.

• જેતલસર ગામના ખડૂતોને ખેતરે જવા આવવામાં મુશ્કેલી
• ખેડૂતોએ એક પુલ બનાવવાની કરી માંગ
• રાજાશાહી સમયથી છે આ પ્રશ્ન

રાજકોટ: જેતપુર તાલુકાના જેતલસર ગામના ડેડરવા રોડ ઉપર આવેલા ખોડિયારની ધાર બાજુ આવેલા ખેડૂતોને તેના ખેતરે જવા આવવા માટે છેલ્લાં 7 મહિનાથી મુશ્કેલી પડી રહી છે. તેમના આ પ્રશ્નને ઘણા વર્ષો થયા છે. જેતલસર ગામ લોકોના પ્રશ્ન મુજબ ગામના સીમ વિસ્તારમાં આવેલા ખોડિયારની ધાર પાસેથી બે નદી નીકળે છે. જેમાં ડેડરવા ગામની નદી અને જીથુડી ગામની નદી અહીંથી પસાર થાય છે. તેની ઉપર 3 જેટલા ચેક ડેમો આવેલા છે. જે વરસાદની સીઝનમાં ભરાયેલા રહે છે. જેથી ખેડૂતોને આ નદીમાં પણ પાણી ભરાયેલા રહેતા ખેતરે આવવા જવા માટે મોટી મુશ્કેલી પડે છે.

અસંખ્ય જેટલા ખેડૂતોને પડી રહી છે મુશ્કેલી

ખેડૂતોને ખેતરે જવા માટે પોતાના ગાડા, બળદ અને અન્ય વાહનો નદીના આ કાંઠે રાખીને પોતાના ખેતરે જવું પડે છે. જયારે વરસાદની સીઝનમાં તો ખેડૂતો પોતાના ખેતરમાં દવા અને ખાતર પણ છાંટવા જઈ શકતા નથી. અહીં અંદાજિત 1 હજાર વીઘા જેટલી ખેતીની જમીન આવેલી છે. જેને લઇને અસંખ્ય જેટલા ખેડૂતોને પોતાના ખેતરે જવા આવવામાં ખુબ જ મુશ્કેલી પડે છે.