રાજકોટમાં 12 લાખ રૂપિયા જુગારમાં હારી ગયેલી પત્ની વિરૂદ્ધ પતિએ કરી ફરિયાદ

રાજકોટઃ શહેરમાં કરીયાણાના વેપારીએ પોતાની પત્ની વિરૂદ્ધ ફરિયાદ નોંધાવી હતી. ફરિયાદમાં જણાવ્યાનુસાર, વેપારીની પત્નીએ ઘરમાંથી દાગીના ચોરી તેને ફાઈનાન્સ પેઢીમાં ગીરવે મૂક્યાં હતા અને તે પૈસાથી જુગાર રમતી હતી. આમ, ઘરમાં જ ચોરી કરી જુગાર રમતી પત્ની વિરૂદ્ધ ફરિયાદ નોંધાઈ છે. જેની પોલીસે નોંધ લઈને આગળની તપાસ ધરી છે.

રાજકોટ સહકાર મેઈન રોડ પાસે રહેતા કરીયાણા વેપારી અંકિત ભીમાણીએ પોતાની પત્ની વિરૂદ્ધ ભક્તિનગર પોલીસ સ્ટેશનમાં ફરિયાદ નોંધાવી છે. જેમાં અંકિત ભીમાણે જણાવ્યું છે કે, "પત્ની એકતા પોતાના સાસરિયા પક્ષથી છુપાઈને જુગાર રમતી હતી. જેમાં તે અંદાજીત રૂપિયા 12 લાખ હારી ગઈ હતી. ત્યારે તેણે તે રકમ ભરપાઈ કરવા માટે ઘરમાંથી દાગીના ચોરી ફાઈનાન્સ પેઢીમાં ગીરવે મૂકીને અડધા પૈસાની ચૂકવણી કરી હતી. જેની ઉઘરાણી કરવા માટે અલકાબેન નામની મહિલા ઘરે પહોંચી હતી. ત્યારે અંકિતને સમગ્ર ઘટનાની જાણ થઈ હતી."

ઉલ્લેખનીય છે કે, આ ઘટના 3 મહિના પહેલાની છે. પણ બંને પક્ષ વચ્ચે આ મુદ્દે કોઈ સમાધાન થતાં અંકિતે પત્ની વિરૂદ્ધ ફરિયાદ નોંધાવી છે.