ખાનગી શાળાઓ દ્વારા ૩ મહિનાથી વધુ ફી માંગવા બાબતે પોરબંદર NSUI એ કરી ઉગ્ર રજૂઆત

પોરબંદર NSUI એ ખાનગી શાળાઓ દ્વારા ૩ મહિનાથી વધુ ફી માંગવા બાબતે જિલ્લા શિક્ષણ અધિકારીને આવેદન પત્ર પાઠવી ઉઘરાણી કરતી ખાનગી શાળાઓ સામે કડક પગલા ભરવા માંગ કરી હતી.

પોરબંદર: અનલોક-4 ચાલી રહ્યું છે, હજુ સુધી શિક્ષણ કાર્ય શરૂ થશે કે નહિ તે નક્કી નથી. ઓનલાઇન શિક્ષણ અમુક ખાનગી શાળાઓમાં શરૂ કરવામાં આવ્યું છે. તેમાં પણ વાલીઓમાં ઘણો વિરોધ જોવા મળ્યો હતો. શિક્ષણ ફી સિવાયની કોઇ પણ ફી વાલીઓ પાસેથી શાળાના સંચાલકો દ્વારા ઉઘરાવવામા આવશે નહિ. તેમજ 3 માસની જ ફી લઇ શકાશે તેવો આદેશ કરવામાં આવ્યો છે. છતાં અનેક શાળાઓમાં 3 માસથી વધુ ફી ની ઉઘરાણી કરવામાં આવતા NSUI દ્વારા જિલ્લા શિક્ષણ અધિકારીને આવેદન પત્ર પાઠવી ઉઘરાણી કરતી ખાનગી શાળાઓ સામે કડક પગલા ભરવા માંગ કરી હતી.

હાલ પોરબંદર જિલ્લામાં ઘણી ખાનગી શાળાઓ દ્વારા ૩ માસથી વધુ ફીની ઉઘરાણી કરવામાં આવે છે. આ ઉપરાંત શિક્ષણ ફી કેટલી છે, એ પણ હજુ ઘણી ખાનગી શાળાઓ દ્વારા જાહેર કરાયું નથી. ત્યારે પોરબંદર જિલ્લા NSUI એ શિક્ષણ અધિકારી સમક્ષ આ આવેદન રૂપે રજૂઆત કરી હતી કે, જેટલી પણ શાળાઓ દ્વારા FRC મુજબની કેટલી શિક્ષણ ફી છે તે જાહેર કરવામાં આવે. તેમજ વાલીઓને જાણ કરવામાં આવે કે, તેમના બાળકની એટલી શિક્ષણ ફી ભરવાની છે. ઉપરાંત માત્ર ૩ માસની જ હાલ ફી ભરવાની છે, તેવું જાહેર કરવાના કારણે હાલ ઘણા વાલીઓ ફી ભરવાને લઇને મુઝવણમાં છે. જ્યારે શિક્ષણ ફી કેટલી છે, એ પણ વાલીઓને ખબર નથી. હાલ શાળાઓ દ્વારા 3 માસની પણ ફી મંગાઇ રહી છે, તો આ શાળાઓને શિક્ષણ વિભાગ દ્વારા નિર્દેશ કરવામાં આવે. આ ઉપરાંત જેટલી પણ શાળાઓ ૩ માસથી વધુની ફી ઉઘરાણી કરે છે તેમને નોટીસ ફટકારવામા આવે તેવી માંગ કરી હતી. જો આગામી દિવસોમાં આ બાબતે કોઇ યોગ્ય નિર્ણય કરવામાં આવશે નહિ તો ગાંધી ચીંધ્યા માર્ગે આંદોલન કરવાની ફરજ પડશે તેમ NSUI ના પ્રમુખે શિક્ષણ અધિકારીને જણાવ્યું હતું.આ રજૂઆત સમયે પ્રદેશ NSUI ઉપપ્રમુખ તીર્થરાજ બાપોદરા, જિલ્લા પ્રમુખ કિશન રાઠોડ, ઉમેશરાજ બારૈયા, કેનિત ઝાલા, જયદિપ સોલંકી, કુણાલ ગોહેલ, કેવલ જગતિયા, મોહસીન સેરવાની, રાજ ઓડેદરા, રોહિત સિસોદિયા, રાજ વાજા, યશ ઓઝા, વગેરે જોડાયા હતા.