સ્થાનિક સ્વરાજની ચૂંટણીઃ પોરબંદરમાં ભાજપ શાસનનાં છેલ્લા 5 વર્ષના લેખા-જોખા

સ્થાનિક સ્વરાજની ચૂંટણી આગામી 28 ફેબ્રુઆરીના રોજ આવી રહી છે. ત્યારે રાજકીય શાસનના કાર્યકાળ દરમિયાન સત્તાધારી પક્ષે કરેલા લોક કાર્યોના લેખાજોખા અંગે ભારતે સ્થાનિક નેતાઓ પાસેથી જાણવાનો પ્રયાસ કર્યો હતો.

• સ્થાનિક સ્વરાજની ચૂંટણી અગાઉ પોરબંદરમાં સત્તાધારી પક્ષનાં 5 વર્ષનાં શાસનનાં લેખા-જોખા
• ભાજપના શાસનમાં ચોપાટીનું નવિનીકરણ, અસમાવતી રિવર ફ્રન્ટ તેમજ બંદરનો વિકાસ કર્યો
• ભૂગર્ભ ગટરો, ડામરનાં રસ્તાઓ, પેવર બ્લોક, પશુ દવાખાના, કૃષિ યુનિવર્સિટી પણ બનાવાઈ
  

પોરબંદર: આગામી 28 ફેબ્રુઆરીના રોજ સ્થાનિક સ્વરાજની ચૂંટણી યોજાવા જઈ રહી છે. ત્યારે રાજકીય શાસનના કાર્યકાળ દરમિયાન સતત પાર્ટીએ કરેલા લોક કાર્યોના લેખાજોખા અંગે ભારતે સ્થાનિક નેતાઓ પાસેથી જાણવાનો પ્રયાસ કર્યો હતો તથા પાર્ટીના કાર્યો સામે વિપક્ષનો શું મંતવ્ય છે તે પણ ETV ભારતે જાણવાનો પ્રયાસ કર્યો હતો. આગામી ચૂંટણીમાં લોકો જ નક્કી કરશે કે સત્તાનું સુકાન કોને આપવું?

પોરબંદરમાં ભાજપે વિકાસના અનેક કાર્યો કર્યા

પોરબંદર જિલ્લા ભાજપના પ્રમુખ કિરીટભાઈ મોઢવાડિયાએ જણાવ્યું હતું કે, પોરબંદર નગરપાલિકામાં શાસન દરમિયાન ભાજપે અનેક વિકાસના કાર્યો કર્યા છે. જેમાં ચોપાટીનું નવીનીકરણ, અસમાવતી રિવર ફ્રન્ટ, બંદરના વિકાસ કાર્ય, ભૂગર્ભ ગટર, ડામરના રસ્તાઓ, પેવર બ્લોક, પશુ દવાખાના, કૃષિ યુનિવર્સિટી સહિત જિલ્લામાં જળ સિંચાઇનાં કાર્યોમાં ચેકડેમ, તળાવો ઉંડા કરવા તથા કેનાલ બનાવવા સહિત અનેક કાર્યો કર્યા છે અને વિકાસના કાર્યોના મુદ્દાને લઇને જ આગામી ચૂંટણી લડશે, તેમ જણાવ્યું હતું.

વિપક્ષનો આક્ષેપ: પોરબંદરમાં માત્ર ગણતરીનાં લોકોનો વિકાસ થયો છેકોંગ્રેસ શહેર મહામંત્રી લાખણશી ગોરાણીયાએ જણાવ્યું હતું કે, છેલ્લા દસ વર્ષથી પાલિકામાં ભાજપનું શાસન છે, પરંતુ પોરબંદરમાં યુપીએ સરકાર હતી તે દરમિયાન 872 કરોડ રૂપિયા પોરબંદરના વિકાસમાં ફાળવવામાં આવ્યા હતા. જેમાં પણ ભૂગર્ભ ગટર, આવાસ યોજના, રોડ-રસ્તાઓના કાર્યો માં મોટાપાયે ભ્રષ્ટાચાર થયો હોવાનો આક્ષેપ કર્યો હતો. આ ઉપરાંત ફાયરબ્રિગેડમાં જગ્યાઓ ખાલી છે અને હોસ્પિટલોમાં એમ્બ્યુલન્સની સુવિધા નથી. નગરજનો માટે સીટી બસની સેવા પણ બંધ કરવામાં આવી છે. જિલ્લા પંચાયત દ્વારા સંચાલિત એમ.એમ સ્કૂલમાં જ 60 ટકા શિક્ષકોની જગ્યા ખાલી છે. તો જિલ્લામાં પણ ભાજપનું શાસન છે. સરપંચથી લઇ તમામ સ્થાને ભાજપનું શાસન હોવા છતાં સિંચાઈનું પાણી અંગે કોઈ કાર્ય કરવામાં આવ્યા નથી. આ ઉપરાંત ખેડૂતોને પણ પોષણક્ષમ ભાવ ન મળતાં હોવાનો આક્ષેપ કર્યો હતો અને જણાવ્યું હતું કે, માત્ર સિલેક્ટેડ લોકોનો વિકાસ થયો હોઈ સામાન્ય માણસોને વિકાસે સ્પર્શ પણ નથી કર્યો. ત્યારે આગામી ચૂંટણીમાં લોકો જ નક્કી કરશે કે સત્તાનું સુકાન કોને આપવું જોઇએ?