રાધનપુરમાં 199 પરપ્રાંતીયો અટવાયા, તંત્ર સામે શ્રમિકોએ ઠાલવ્યો રોષ

રાધનપુર પંથકમાં છૂટક મજૂરી કરી પરિવારનું ગુજરાન ચલાવતા 199 પરપ્રાંતિયોને વહીવટીતંત્ર દ્વારા તેમના માદરે વતન ઉત્તરપ્રદેશ મોકલવા માટે રાધનપુરથી પાલનપુર સુધી અને પાલનપુરથી ટ્રેનમાં બેસવા સુધીની વ્યવસ્થા કરી હતી. પણ ઉત્તરપ્રદેશ જવાની ટ્રેન રદ થતા પરપ્રાંતીઓ અટવાયા હતા. જે મામલે તેઓએ રાધનપુર પ્રાંત કચેરી ખાતે આવી રજૂઆત કરી પોતાનો રોષ વ્યક્ત કર્યો હતો.

પાટણ : કોરોના મહામારીને કારણે સમગ્ર દેશમાં લોકડાઉન અમલી છે. ત્યારે લોકડાઉન 3માં કેન્દ્રના ગૃહ વિભાગ દ્વારા તાજેતરમાં આંતર રાજ્ય અને જિલ્લામાં જવા માટેની મંજૂરી આપી છે. જેને લઇ દરરોજ વહીવટીતંત્ર દ્વારા ગુજરાતમાંથી હજારોની સંખ્યામાં પરપ્રાંતીઓને દેશના અલગ-અલગ રાજ્યોમાં મોકલવામાં આવી રહ્યા છે.

ત્યારે રાધનપુર શહેર સહિત પંથકમાં છૂટક મજૂરી કરી ગુજરાન ચલાવતા ઉત્તર પ્રદેશના 199 શ્રમિકોનું લિસ્ટ રાધનપુર વહીવટીતંત્રે તૈયાર કરી ઉત્તરપ્રદેશ મોકલ્યુ હતું અને ત્યાંથી મંજૂરી મળતા આ પરપ્રાંતીયોને તેમના માદરે વતન મોકલવા રાધનપુરથી પાલનપુર સુધી સરકારી સાત બસોની વ્યવસ્થા કરી હતી અને પાલનપુરથી ટ્રેન મારફતે મોકલવાની વ્યવસ્થા કરી હતી.

રાધનપુરમાં 199 પરપ્રાંતીયો અટવાયા

ટ્રેન માટેનું ભાડુ પણ વહીવટી તંત્રએ વ્યક્તિદીઠ રૂપિયા 525 ઉઘરાવવામાં આવતું હતું .જ્યારે આ શ્રમિકો વતન જવાની ખુશીમાં નક્કી કરેલા સ્થળે પહોંચતા હતા પણ ઉત્તરપ્રદેશ જતી ટ્રેન રદ થતાં આ શ્રમિક પરિવારો અટવાયા હતા. ટ્રેનની ટિકિટના ભાડાના પૈસા આપ્યા હોવા છતાં ટ્રેન રદ થતા પરપ્રાંતીઓમાં સરકારની નીતિ સામે સામે આક્રોશ જોવા મળ્યો હતો.

અટવાયેલા પરપ્રાંતિયો માટે રાધનપુરની સેવાભાવી સંસ્થા રામ સેવા સમિતિએ ભોજનની વ્યવસ્થા પૂરી પાડી હતી. જોકે વહીવટી તંત્ર એ કોઈ જ વ્યવસ્થા ન કરતા લોકોમાં ભારે નારાજગી જોવા મળી હતી.