પાટણમાં ઑક્સિજન પ્લાન્ટ પર લાંબી લાઈનો લાગી

પાટણ જિલ્લામાં કોરોના મહામારીની વિકટ પરિસ્થિતિમાં તમામ હોસ્પિટલો દર્દીઓથી ભરાઈ ગઈ છે સાથે જ ઑક્સિજનની પણ ભારે અછત ઊભી થઇ છે. ઑક્સિજનની અછતને કારણે દર્દીઓને હાલાકી વધી છે અને ઑક્સિજનની એક બોટલ મેળવવા દર્દીના સગાઓને ભારે રઝળપાટ કરવી પડે છે. જિલ્લાના એકમાત્ર ઑક્સિજન પ્લાન્ટ પર સિલેન્ડર ભરવા માટે દર્દીના પરિવારજનોની લાંબી કતારો સર્જાઈ છે.

• પાટણ જિલ્લામાં ઑક્સિજનની ભારે અછત
• દર્દીના પરિવારજનો ઑક્સિજન મેળવવા કરી રહ્યા છે રઝળપાટ
• ઑક્સિજન પ્લાન્ટ પર વાહનોની લાંબી કતારો સર્જાઇ

પાટણ: જિલ્લામાં કોરોના સંક્રમણ વધતાં પોઝિટિવ કેસોની સંખ્યામાં સતત વધારો થઈ રહ્યો છે. કોરોના સંક્રમિત દર્દીઓની સંખ્યા વધવાને પગલે હોસ્પિટલમાં બેડ, રેમડેસીવીર ઇન્જેક્શન તેમજ ઑક્સિજન અને વેન્ટિલેટર જેવી મહત્વની સુવિધાની અછત ઉભી થઇ રહી છે ત્યારે જિલ્લામાં એકમાત્ર ઑક્સિજન પ્લાન્ટ ખાતેથી જિલ્લાની તેમજ આસપાસના પંથકની 54 જેટલી હૉસ્પિટલોમાં આ ઑક્સિજનનો જથ્થો ફાળવવામાં આવે છે પરંતુ દર્દીઓ વધતા ઑક્સિજનની ભારે અછત સર્જાવા પામતા દર્દીઓની હાલાકીઓ વધવા પામી છે અને ઑક્સિજનની એક બોટલ મેળવવા માટે ભારે રઝળપાટ કરવાનો વારો આવ્યો છે. જેને લઇ ઑક્સિજનની એક બોટલ ભરાવા માટે પ્લાન્ટ પર 8 થી 10 કલાક સુધી દર્દીના પરિવારજનોને લાંબી લાંબી કતારોમાં ઉભા રહેવાનો વારો આવ્યો છે અને તેમાં પણ ઑક્સિજન મળે કે ન પણ મળે તેનું પણ કાંઈ નક્કી નહીં એટલે હવે પાટણ જિલ્લામાં દર્દીઓ નોંધારા બન્યા છે.

વધુ વાંચો: મધ્યપ્રદેશના છતરપુરમાં હોસ્પિટલમાં ઓક્સિજન સપ્લાય બંધ થતાં 6 દર્દીઓના મૃત્યુ

ઑક્સિજનના અભાવે દર્દીઓ નોધારા બન્યા

પાટણના ઑક્સિજન પ્લાન્ટ ખાતેથી જિલ્લાની તેમજ આસપાસના પંથકમા 54 જેટલી હૉસ્પિટલમાં જથ્થો ફાળવવામાં આવે છે અને તેમાંથી ઑક્સિજનનો જથ્થો વધે તો માનવતા રાખીને પ્લાન્ટની બહાર કતારોમાં ઉભેલા લોકોને ઑક્સિજનનો જથ્થો ફાળવવામાં આવે છે.

વધુ વાંચો: પહેલી વખત સેનાના વિમાનથી થઇ મ.પ્રદેશના ખાલી સિલિન્ડરની ડિલિવરી