પાટણ: રાજ્યના મુખ્યપ્રધાન ભુપેન્દ્ર પટેલના અધ્યક્ષ સ્થાને ગોકુલ ગ્લોબલ યુનિવર્સિટીનો પદવીદાન સમારોહ (CM Bhupendra Patel in Siddhpur) સંપૂર્ણ કોવિડ-19 ગાઈડલાઈન સાથે યોજાયો હતો. આ પદવીદાન સમારોહમાં વિવિધ વિદ્યાશાખાના 16 વિદ્યાર્થીઓને સુવર્ણચંદ્રક અને 16 વિદ્યાર્થીઓને રજતચંદ્રક સહિત કુલ 970 વિદ્યાર્થીઓને મહાનુભાવોના હસ્તે પદવી એનાયત કરવામાં આવી હતી. ગોકુલ ગ્લોબલ યુનિવર્સિટીના (Gokul Global University convocation ceremony) પ્રમુખ બલવંતસિંહ રાજપૂતે મુખ્યપ્રધાન સહિતના મહાનુભાવોનું સ્મૃતિ ચિન્હ આપી અભિવાદન કર્યું હતું. તો યુનિવર્સિટીના કુલપતિએ વિદ્યાર્થીઓને શપથ લેવડાવ્યા હતા.
21મી સદી જ્ઞાનની સદી બની છે: મુખ્યપ્રધાન ભુપેન્દ્ર પટેલ
રાજ્યના મુખ્યપ્રધાને વિદ્યાર્થીઓને સંબોધન કરતાં જણાવ્યું હતું કે, શિક્ષણની દિશા અને દશા બદલાઇ છે. 21મી સદી જ્ઞાનની સદી બની છે. વિશ્વના સૌથી યુવાન દેશ તરીકે ભારતે વૈશ્વિક પ્રયાણ કર્યું છે. વિશ્વના યુવાઓ સાથે ગુજરાતનો યુવા આંખ મેળવી શકે તે પ્રકારની કામગીરી કરે તે વડાપ્રધાનનું સ્વપ્ન છે. તજજ્ઞતા પ્રાપ્ત કરવા માટે આજે ગુજરાતમાં 55થી વધુ યુનિવર્સિટીઓ વડાપ્રધાનના વિઝનને લીધે કાર્યરત છે. રિસર્ચ અને ઇનોવેશનને વેગ આપી ગુજરાત સરકારે નવી શિક્ષણ નીતિ ડેવલોપમેન્ટનો રોડ મેપ તૈયાર કર્યો છે.
અનેક મહાનુભાવો રહ્યાં ઉપસ્થિત
ગુજરાતના યુવાનોને દેશ માટે સેવા કરવાની અમૂલ્ય તક છે અને વડાપ્રધાન મોદીના નેતૃત્વમાં આવનારા ભારત માટે પડકાર અને તક પરિવર્તિત કરીને પ્રતિબદ્ધ થવા યુવાઓને મુખ્યપ્રધાને આહ્વાન કર્યું હતું. દીક્ષાંત સમારોહમાં શિક્ષણ પ્રધાન જીતુ વાઘાણી, ઉદ્યોગ પ્રધાન જગદીશ વિશ્વકર્મા, ગોકુલ ગ્લોબલ યુનિવર્સિટીના પ્રમુખ બળવંતસિંહ રાજપૂત, રાજ્યના પૂર્વ ગૃહપ્રધાન રજની પટેલ, જિલ્લા ભાજપ પ્રમુખ દશરથજી ઠાકોર સહિતના મહાનુભાવો ઉપસ્થિત રહ્યા હતા.
આ પણ વાંચો: સોમનાથ સંસ્કૃત યુનિ.નો 5 માર્ચે 13મો પદવીદાન સમારોહ યોજાશે
આ પણ વાંચો: JAU Graduation Ceremony: જૂનાગઢ એગ્રીકલ્ચર યુનિવર્સિટીમાં 17મો પદવીદાન સમારોહ યોજાયો
