પાટણમાં નર્મદાની માઇનોર કેનાલોમાં પાણી ન છોડતા ખેડૂતો ચિંતિત

પાટણ જિલ્લામાં ચોમાસુ વાવેતરમાં ખેડૂતો દ્વારા મુખ્યત્વે બીટી કપાસનું વાવેતર કરવામાં આવતું હોય છે. પણ ચાલુ વર્ષે નર્મદાની માઇનોર કેનાલમાં પાણી ન છોડાતા જગતનો તાત ચિંતિત બન્યો છે.

પાટણઃ જિલ્લામાં ચોમાસુ બેસતા ખેડૂતોએ પોતાનાં ખેતરો ખેડી વિવિધ પાકોનું વાવેતર હાથ ધર્યું છે. જિલ્લામાં 10232 હેકટરમાં ખેડૂતોએ બીટી કપાસ, શાકભાજી અને ઘાસચારા સહિતનું વાવેતર કર્યું છે. આ સાથે જ ખેડૂતો દ્વારા ખર્ચ કરી પાકનું ઉત્પાદન વધારવામાં આવે છે. ખાતર બિયારણ તેમજ જંતુનાશક દવાઓ સહિતનો વીઘા દીઠ આશરે સાતથી દસ હજારનો ખર્ચ કરવો પડતો હોય છે અને કપાસનું ઉત્પાદન મેળવવા ચારથી પાંચ વાર પાણીની જરૂર પડે છે. ત્યારે સરકાર દ્વારાકેનાલમાં પાણી ન છોડવાથી હાલમાં ખેડૂતોની ચિંતા વધી છે.

ચોમાસુ શરૂ થતાં કેટલાક ખેડૂતોએ વાવણી કરી દીધી છે. ખેડૂતોએ હજારોનો ખર્ચ કરી પાકનું વાવેતર કર્યુ છે. જે પાકને હવે પાણીની જરૂર છે. ત્યારે સરકાર દ્વારા કેનાલમાંથી પાણી ન છોડાતાં ખેડૂતો ચિંતામાં મુકાયા છે. ખેડૂતોને સિંચાઈ માટે પાણી મળી રહેશે તેવી સરકાર દ્વારા વાતો કરવામાં આવી છે પણ જિલ્લાનો ખેડૂત નર્મદાની માઇનોર કેનાલમાં પાણીથી વંચિત છે. હજી સુધી એક પણ કેનાલમાં પાણી છોડવામાં આવ્યું નથી.

પાટણમાં નર્મદાની માઇનોર કેનાલોમાં પાણી ન છોડતા ખેડૂતો ચિંતિત

જેથી ફરી એકવાર સરકારની જાહેરાત ખેડૂતો માટે ઠગારી નીવડી છે અને ખેડૂતોને ઉપર ફરી પડતા પર પાટું જેવી સ્થિતિ થઈ છે. ત્યારે ખેડૂતો દ્વારા જિલ્લાની નર્મદાની કેનાલમાં સત્વરે પાણી છોડવામાં આવે તેવી માંગ કરવામાં આવી છે.