પાટણઃ શહેર સહિત જિલ્લામાં છેલ્લા કેટલાક દિવસથી સર્જાયેલા વરસાદી વાતાવરણને પગલે ખેડૂતોમાં ફફડાટ ફેલાયો છે. ત્યારે આજે (શનિવારે) સાંજે પાટણ પંથકમાં વાવાઝોડા સાથે કરા સાથે ધોધમાર વરસાદ પડતા જનજીવન પ્રભાવિત બન્યું હતું. આ કમોસમી વરસાદના કારણે જિલ્લામાં ઉભા પાકો તેમજ તૈયાર થયેલા પાકોને ભારે નુકસાન થતા ખેડૂતોના મોઢામાં આવેલો કોળિયો છીનવાયો છે
આ પણ વાંચોઃ Unseasonal Rain: વરસાદથી લોકોએ તો ઠંડક અનુભવી પણ ખેડૂતોએ રોવાનો વારો આવ્યો, હજી 19મી સુધી આગાહી
એક કલાક સુધી ધોધમાર વરસાદઃ વેસ્ટર્ન ડિસ્ટર્બન્સ અને સાઈક્લોનિક સર્ક્યુલેશન સિસ્ટમના કારણે છેલ્લા કેટલા દિવસોથી પાટણ જિલ્લાનું વાતાવરણ વાદળછાયુ બન્યું છે. એક અઠવાડિયા પહેલાં પાટણ શહેર સહિત જિલ્લાના વિવિધ ગ્રામ્ય વિસ્તારોમાં કમોસમી વરસાદ વરસ્યો હતો. ત્યારબાદ આજે સાંજે વાતાવરણમાં એકાએક પલટો આવ્યો ને આકાશમાં કાળા ડિબાંગ વાદળો છવાઈ ગયા હતા.
પવન સાથે વરસાદઃ ત્યારબાદ ઠંડા પવન ફૂંકાતા ધોધમાર વરસાદ શરૂ થયો હતો. જોકે, ભરઉનાળે જાણે અષાઢી માહોલ સર્જાયો હોય તેવું વાતાવરણ સર્જાયું હતું. પાટણ શહેર સહિત જિલ્લાના વિવિધ ગ્રામ્ય વિસ્તારોમાં ભારે પવનનો અને કરા સાથે વરસાદ પડ્યો હતો, જેના કારણે જનજીવન પ્રભાવિત બન્યું હતું. તો વરસાદી પાણી માર્ગો ઉપર ગોઠણસમા પાણી ભરાયા હતા. તેના કારણે વાહનવ્યવહાર થંભી ગયો હતો. અહીં એક કલાક સુધી અનરાધાર વરસાદ વરસતા ચોતરફ જળબંબાકારની સ્થિતિ સર્જાઈ હતી.
કરા પડતા વાહનવ્યવહાર થંભી ગયોઃ સાંજના સુમારે વાતાવરણમાં આવેલા એકાએક પલટાના કારણે અંધારપટ છવાયો હતો. ને જોતજોતામાં વરસાદે પોતાનું રૌદ્ર સ્વરૂપ ધારણ કર્યું હતું. સાથે જ વિજળીના કડાકાં તેમ જ ભારે પવનો સાથે બરફના કરા સાથે એકાએક વરસાદ શરૂ થયો હતો. ત્યારે શહેરના મુખ્ય માર્ગો અને હાઈવે માર્ગો ઉપર અફરાતફરી મચી હતી, જેને લઈ માર્ગો ઉપર વાહનવ્યવહાર થંભી ગયો હતો. પાટણ પંથકમાં ઘણા વર્ષો બાદ વરસાદ સાથે બરફના કરા પડતા બાળકો સહિત મોટા લોકોમાં પણ કરા જોઈ કુતુહુલ જોવા મળ્યું હતું. તો કેટલાક પરિવારોએ પોતાના ઘરના ધાબા કે આંગણામાં હાથમાં અને વાસણોમાં કરા એકત્ર કર્યા હતા.
આ પણ વાંચોઃ Unseasonal Rain : રાજ્યમાં કરા સાથે કમોસમી વરસાદથી ક્યાક શિમલા જેવા દ્રશ્યો પણ ખેડૂતોને ઉપાદીનો માર
ખેડૂતો પાયમાલ થયાઃ પાટણ સમી, શંખેશ્વર, રાધનપુર પંથકમાં કરા સાથે વરસાદ પડ્યો હતો, જેને કારણે કપાસ, રાઈડો, જિરૂં, દિવેલા ઘઉં, ચણા અને તમાકુના પાકોને ભારે નુકસાન થયું હતું. તો કેટલાક ખેતરોમાં પાક તૈયાર થઈ જતા કાપણી અને વિણી ચાલુ હોવાથી ખેડૂતોના મોઢામાં આવેલો કોળિયો છીનવાતા ખેડૂતો પાયમાલ થયા છે.
