પંચમહાલમાં MGVCLના કર્મીઓ ઉપર હુમલા મામલે બે ઈસમોની ધરપકડ

ગોધરા: પંચમહાલ જિલ્લાના શહેરા તાલુકાના પસનાલ ગામે પાંચમી સપ્ટેમ્બરના દિવસે વીજ ચેંકીગ કરવા ગયેલી MGVCLની ટીમના કર્મચારીઓ ઉપર કેટલાક ઈસમો દ્વારા હુમલો કરવાની ઘટના બની હતી. જેમા હુમલાનો ભોગ બનેલા કર્મચારી દ્વારા શહેરા પોલીસ મથકે ફરીયાદ નોંધાવામાં આવી હતી. આ મામલે પોલીસ દ્વારા સઘન તપાસ હાથ ધરવામાં આવતા બે ઇસમોની ધરપકડ કરવામાં આવી હતી. હાલ બે આરોપીઓ ફરાર છે. તેમને પકડવાની તજવીજ ચાલી રહી છે. પોલીસે આ દિશામાં કાયદેસરની કાર્યવાહી હાથ ધરી છે.

મળતી વિગતો મુજબ, શહેરા તાલુકામાં વીજચોરીના પગલે MGVCL દ્વારા ચેંકીગ હાથ ધરવામાં આવ્યું હતું. જેમાં ગત પાંચમી સપ્ટેમ્બરના રોજ સવારના સમયમા MGVCLના કર્મચારીઓ બોલેરો જીપ લઇને શહેરા તાલુકાના પસનાલ ગામના વણઝારા ફળીયામા પહોંચ્યા હતા. જેમા MGVCL કર્મચારીઓએ ફળીયાના કેટલાક ઘર પાસે પસાર થતી વીજલાઇનમાંથી લંગર નાખી ચોરી કરતા જોઈ જતા વીજકર્મીઓએ લંગરનો વાયર પાછો માગતા વણઝારા ફળીયાના રણછોડ ભાઇ કાળુ ભાઇ વણઝારા,દિલીપભાઇ કાળુભાઈ વણઝારા, મમતાબેન રણછોડભાઇ વણઝારા તેમજ કાળુભાઈ સરવણભાઇ વણઝારા હાથમાં કુહાડી અને લાકડી લઇને વીજકર્મીઓને અહીંથી જીવતા જવા દેશું નહી અને જાનથી મારી નાખવાની ધમકી આપી MGVCLના વાહનને લાકડી મારી નુકશાન પહોંચાડયું હતું. પોતાના પર થયેલા હુમલાના પગલે કર્મચારીઓ પોતાનો જીવ બચાવવા ભાગ્યા હતા. આ મામલે એક કર્મીએ વીડીઓ પણ ઉતાર્યો હતો.

હાલ હુમલાનો ભોગ બનેલા ચિરાગ કુમાર મેવાડાએ ફરિયાદી બનીને શહેરા પોલીસ મથકમાં ઉપરોકત આરોપીઓ વિરુદ્ધ પોલીસ ફરિયાદ નોંધાઇ હતી. જો કે, ફરિયાદ નોંધાતા આરોપીઓ ફરાર થઈ ગયા હતા. ઘટનાના પાંચ દિવસ બાદ શહેરા પોલીસે પસનાલ ગામમાથી જ બે આરોપીઓ રણછોડભાઇ કાળૂભાઈ વણઝારા અને દિલીપભાઈ કાળુ ભાઈ વણઝારાને ઝડપીને સઘન પુછપરછ હાથ ધરી છે. આ આરોપીઓ દ્વારા અગાઉ ભુતકાળમાં આવા ગુનોઓ કર્યા છે કે નહિ તે દિશામાં પણ તપાસ હાથ ધરી છે. હાલ નાસતા ફરતા બે આરોપીઓને પકડવાના બાકી હોય તેમને વહેલી તકે પકડી લેવાશે તેમ પોલીસ અધિકારીએ જણાવ્યું હતું.

ઉલ્લેખનીય છે કે, પંચમહાલના ગ્રામીણ વિસ્તારોમાં વીજચોરીની ઘટના વધી રહી છે. વીજચોરી કરનારા વીજમીટરમાં સીધુ કનેકશન તેમજ પસાર થતી વીજલાઈન ઉપર સીધો વાયર ભેળવીને ચોરી કરતા હોય છે.