પંચમહાલના ડેરોલ ગામમાં વર્ષોથી પારંપરિક રીતે માટલી ગરબા યોજાય છે. ઘણા વર્ષોથી યોજાતા આ ગરબાની વિશેષતા એ છે કે, તે દશેરાની રાત્રીએ ગરબાનું આયોજન કરવામાં આવે છે. ગામમાં આવેલ દુર્ગા માતાજીના મંદિરે માનેલી માનતા પૂર્ણ થતા શ્રદ્ધાળુઓ માતાજીને 11થી લઈને 101 જેટલા ગરબા ચડાવતા હોય છે.
મહિલાઓ અને પુરુષો પરંપરા મુજબ માથે માટલી મુકીને ગરબે ઘૂમે છે, અહીં ગરબાની સાથે સાથે આદ્યશક્તિ માઁ અંબામાં રહેલી ભક્તોની આસ્થાના દર્શન થાય છે. શણગારેલી માટલી માથે મૂકી સ્ત્રીઓ ગરબે ઘૂમી માઁ અંબાની આરાધના કરી રહીં છે. તેઓને ગૌરવ છે કે, ડેરોલ ગામે આજે પણ ભારતીય સંસ્કૃતિ અને પરંપરાને જાળવી રાખી છે. અહીં આસ-પાસના ઘણા ગામોમાંથી માઈ ભક્તો નવરાત્રી દરમિયાન પોતાના ઘરે મુકેલ માતાજીનો ગરબો લઈને આવે છે અને દશેરાના દિવસે ગરબાને માથે મૂકી ગરબે ઘૂમે છે.
જે માઈ ભક્ત પોતે કોઈ માનતા માનવા માગતા હોઈ તે, અને જેની માનતા પૂર્ણ થઇ હોય તે પણ માથે ગરબો (માટલી) મૂકી ગરબે ઘૂમે છે. આ વખતે ડેરોલના પ્રખ્યાત દશેરાના માટલી ગરબાથી વિદેશી મહેમાનો પણ આકર્ષિત થયાં છે. મલાવ યોગ યુનિવર્સીટીની મુલકાતે આવેલા વિદેશી મહેમાનો પણ માટલી ગરબે રમવાનું ચૂક્યા નથી.
ડેરોલ ગામના પ્રખ્યાત માટલી ગરબાની થીમને દર વર્ષે વિભિન્ન ફૂલોથી શણગારી બનાવવામાં આવે છે. આ વખતે થીમ તરીકે ચંદ્રયાન-2 અને કલમ 370 તથા 35Aની રંગોળી પૂરવામાં આવી હતી. આ રંગોળી ગરબે ઘૂમવા આવનાર તમામ ભક્તોના આકર્ષણનું કેન્દ્ર બની હતી.
