તો આ મામલે ચૂંટણી પંચને પક્ષકાર બનાવવાની ભૂપેન્દ્રસિંહ ખાંટની માંગ હાઇકોર્ટે ફગાવી દેતા ઇલેક્શન કમિશન હવે મોરવાહડફ બેઠક સંદર્ભે પોતાના અભિપ્રાય આપી શકે તેમ છે. જો ઈચ્છે તો ખાંટને ગેરલાયક ગણાવી બેઠક પર પેટા-ચૂંટણીની જાહેરાત પણ કરી શકે છે.
ત્યારે સમગ્ર મામાલનો મૂળ મુદ્દો એટલે કે ખાંટના ખોટા આદિજાતિના સર્ટિફિકેટ મામલે આગામી 3જી એપ્રિલના રોજ સુનાવણી હાથ ધરાશે. જેમાં કોંગ્રેસના દિગ્ગજ નેતા અર્જુન મોઢવાડિયાએ ખાંટનો બચાવ કરતા કહ્યું હતુ કે, સરકારને સમર્થન ન કરતા હોવાથી રાજ્ય સરકાર હેરાનગતિ કરી રહી છે. ભૂપેન્દ્રસિંહ ખાંટના સર્ટિફિકેટને 14 સભ્યોની સમિતિ દ્વારા માન્ય રાખવામાં આવ્યું હતું.
તો આ મામલે 29મી જૂનના રોજ હાઇકોર્ટની સિંગલ જજ જસ્ટિસ બેલા ત્રિવેદીએ ભૂપેન્દ્રસિંહ ખાંટના આદિજાતિના સર્ટિફિકેટને ગેરકાયદેસર જાહેર કર્યો હતો. ત્યારે જસ્ટિસ બેલા ત્રિવેદીએ આદિજાતિ વિકાસ પંચના નિર્ણયને યોગ્ય ગણાવ્યો હતો. જ્યારબાદ આ ચુકાદાને ચીફ જસ્ટિસની ડબલ બેન્ચમાં પડકારવામાં આવી હતી. જેમાં ખાંટ તરફથી ચૂંટણી પંચને પક્ષકાર બનાવવાની માંગને આજે હાઇકોર્ટે ફગાવી દીધી છે.
જો કે જસ્ટિસ બેલા ત્રિવેદીએ આ મામલે અગાઉ આપેલા ચુકાદામાં ઉલ્લેખ કર્યો હતો કે, ભુપેન્દ્રસિંહના પિતા આદિજાતિ સમુદાય સાથે સંકળાયેલા ન હોવા છતાં અરજદારે હિન્દૂ ભીલનું પ્રમાણપત્ર મેળવ્યું હતું. તો આ મામલે સ્ક્રુટીની કમિટી દ્વારા ભૂપેન્દ્રસિંહ ખાંટનો જાતિનો પ્રમાણપત્ર રદ કર્યો છે. જે યોગ્ય હોવાનું જણાવ્યું હતું.
આ મામલે ખાંટે જણાવ્યું કે, તેના પિતા બિન આદિજાતિ સમુદાય સાથે સંકળાયેલા છે. જ્યારે માતા આદિજાતિ સમુદાયથી સંકળાયેલા હોવાથી તેમનો જાતિનો પ્રમાણપત્ર યોગ્ય છે. ભૂપેન્દ્રસિંહ ખાંટ આદિજાતિ માટે સમુદાયઆરક્ષિત બેઠક મોરવાહડફથી વર્ષ 2017ની વિધાનસભા ચૂંટણી લડ્યા હતા. જ્યાં તેઓ વિક્રમસિંહ ડિંડોર સામે 4,366 મતથી ચૂંટણી જીત્યા હતા.
