નવસારી: કોરોના સામેની જંગમાં સરકાર દ્વારા પાન, માવા, ગુટખાના વેચાણ ઉપર પ્રતિબંધ ફરમાવ્યો છે, પરંતુ ચોરી છુપે એનું નવસારીમાં ઉંચા ભાવે ધૂમ વેચાણ ચાલી રહ્યુ છે. જેમાં આજે સોમવારે નવસારી ટાઉન પોલીસે પેટ્રોલિંગ દરમિયાન શહેરના દસ્તુરવાડના એક એપાર્ટમેન્ટમાંથી 60 હજાર રૂપિયાના પ્રતિબંધિત ગુટખા સાથે તેનું વેચાણ કરનારા ત્રણ આરોપીઓની ધરપકડ કરી હતી.
કોરોના મહામારીથી નાગરિકોને બચાવવા સરકાર દ્વારા તમામ પ્રયાસો કરવામાં આવી રહ્યાં છે. જેમાં પણ સોશ્યલ ડીસ્ટનસિંગ, મોઢે માસ્ક, હાથ ધોવા, જાહેરમાં થૂકવું નહિ, જેવા નિયમોને અનિવાર્ય બનાવવામાં આવ્યા છે. ખાસ કરીને પાન, માવા, ગુટખાના ખાવા અને વેચાણ પર પ્રતિબંધ મૂકી દેવામાં આવ્યો છે, જેને કારણે લોકો જાહેરમાં થુકી ન શકે, પરંતુ સરકારના જાહેરનામાં બાદ પણ નવસારી શહેર અને જિલ્લામાં ચોરી છુપે તમાકુયુક્ત માવા અને ગુટખાનું વેચાણ થાય છે અને લોકો 7 થી 8 ગણા ઉંચા ભાવો લોકો લઇ રહ્યાં છે.
જોકે ટાઉન પોલીસ લોક ડાઉનના નિયમોનું ચુસ્ત પાલન કરાવવાના પ્રયાસો કરી રહ્યા છે. દરમિયાન આજે સોમવારે પોલીસને પેટ્રોલિંગ દરમિયાન બાતમી મળી હતી કે, શહેરના દસ્તુરવાડમાં આવેલા મોહામદી એપાર્ટમેન્ટના ફ્લેટ 103 માં મોટા પ્રમાણમાં વિમલ ગુટખા રાખવામાં આવ્યા છે. જેને આધારે પોલીસે ઘટના સ્થળે છાપો માર્યો હતો.
જ્યાંથી 10 પ્લાસ્ટિકના કોથળામાં વિમલ પાન-મસાલા અને બે કોથળામાં વિમલ તમાકુના પેકેટ્સ મળી આવ્યા હતા. પોલીસે કુલ 60 હજાર 450 રૂપિયાના વિમલ ગુટખાને જપ્ત કરી તેનું વેચાણ કરતા ત્રણને ઝડપી પાડ્યા હતા. જેમાં પોલીસે દસ્તુરવાડ મોહમદી એપાર્ટમેન્ટમાં રહેતા યાસીન મેમણ, દસ્તુરવાડના ક્વીન ટાવર એપાર્ટમેન્ટમાં રહેતા વસીમ મેમણ અને દસ્તુરવાડના અલફલા એપાર્ટમેન્ટમાં રહેતા રિયાઝ લોહિયાની પ્રતિબંધિત વસ્તુઓનું વેચાણ કરી જાહેરનામાનો ભંગ કરવાના ગુનામાં ધરપકડ કરી આગળની તપાસ હાથ ધરી છે.
