દારૂની મહેફિલમાં ઝઘડતા મિત્રોને છોડાવ્યા, મિત્રએ જ મિત્રને મોતને ઘાટ ઉતાર્યો

નવસારીના જલાલપોરમાં મફતલાલ મીલ તળાવમાંથી શંકાસ્પદ અવસ્થામાં મૃત હાલતમાં યુવાનના મૃતદેહ પ્રકરણમાં જલાલપોર પોલીસે હત્યાનો ગુનો નોંધી યુવાનના મિત્રની ધરપકડ કરી છે. તળાવમાં દારૂ પીધા બાદ થયેલી માથાકૂટમાં જે મિત્રએ મધ્યસ્થી કરી બે મિત્રોને છોડાવ્યા હતા. એમાંથી એકે મધ્યસ્થી બનેલા મિત્રને તળાવમાં ઉંચાઈથી પાડ્યા બાદ માર મારીને તેનું ઢીમ ઢાળી દીધુ હોવાનું પોલીસ તપાસમાં સામે આવ્યુ હતું.

નવસારી: શહેરમાં દારૂની લતે ચડેલા યુવાને દારૂની મહેફિલ માણ્યા બાદ બે મિત્રો વચ્ચે થયેલી માથાકૂટમાં મધ્યસ્થી બનતા જીવ ગુમાવવાનો વારો આવ્યો છે.

વાત છે નવસારીના ઘેલખડીમાં રહેતા વિજય નાયકા અને તેના મિત્રોની. જેમાં દારૂની ટેવને કારણે વિજય ગત મંગળવારે ઘરેથી ગયા બાદ પરત ફર્યો ન હતો. તેમજ તેનો મૃતદેહ ગત ગુરૂવારે સવારે મફતલાલ મીલનાં સુકાયેલા તળાવમાંથી મળી આવ્યો હતો. વિજયના માથામાં અને શરીરે ઈજાઓ હોવાથી તેની હત્યાની આશંકા સેવાઈ રહી હતી. જે પોલીસ તપાસમાં સાચી ઠરી છે.

મિત્રો સાથે તળાવમાં દારૂની મહેફિલ વચ્ચે બે મિત્રો વિજય સોલંકી અને રવીન્દ્ર ગાયકવાડ વચ્ચે થયેલી માથાકૂટમાં વિજય મધ્યસ્થી થયો હતો અને બંનેને છોડાવ્યા હતા. જે વિજય સોલંકીને ગમ્યું ન હતું. દારૂ પીધા બાદ બધા ઘરે ગયા, પણ વિજય તળાવની પાળ પર બેસી રહ્યો હતો. ત્યારે આક્રોશિત વિજય સોલંકીએ તેને ધક્કો મારી પાળ પરથી 10 ફૂટ નીચે પાડી તેને માર માર માર્યો હતો. જેમાં ગભીર રીતે ઘવાયેલા વિજય નાયકાનું મોત થયુ હતું. જેની જાણ થતા જ જલાલપોર પોલીસે આરોપી વિજયને ઝડપી પાડી તેની ધરપકડ કરી હતી. આ સાથે જ પોલીસ ચોપડે હત્યાનો ગુનો નોંધી આગળની તપાસ હાથ ધરી છે.