નર્મદામાં 'પ્લાસ્ટિક મુક્ત ભારત' સંદર્ભે સરકારી કાર્યક્રમ યોજાયો. આ કાર્યક્રમમાં બે રસપ્રદ અને સરકારને ગોથે ચઢાવે તેવી ઘટનાઓ બની.
પ્રથમ તો ભરૂચ ભાજપ સાંસદ મનસુખ વસાવાની ફરી એકવાર જીભ લપસી પડી. નર્મદામાં યોજાયેલા પ્લાસ્ટિક મુક્ત ભારતના કાર્યક્રમમાં ભાષણ આપતા તેમણે વિવાદાસ્પદ નિવેદન આપ્યું હતુ. તેમણે કહ્યું કે, કેમિકલવાળો ઈંગ્લીશ દારૂ શરીરમાં જાય તો શરીરને ખતમ કરી નાંખે છે, કેટલાક તો પાછા ગાંજો પીવા જાય છે. પ્લાસ્ટિકની પોટલીનો ઉલ્લેખ કરતા પ્રવચનમાં જણાવ્યું કે, ઘણા બધા પીણાં પોટલી સ્વરૂપે લઈ જાય છે, અને પોટલીથી તો નુકસાન જાય જ છે, પણ પોટલીમાં રહેલ પદાર્થ હોય છે. તેનાથી તો વધુ નુકસાન જાય છે.' એટલે તેમણે પોતાના ભાષણમાં રાજસ્થાનના મુખ્ય પ્રધાન અશોક ગહેલોત દ્વારા ગુજરાતમાં દારૂના વેચાણ અંગે અપાયેલા નિવેદનનું જાણે સમર્થન કર્યું હોય તેમ જણાયું. જ્યારે બીજીતરફ ગુજરાતના મુખ્ય પ્રધાને રાજસ્થાન CMના નિવેદનને ફગાવી દીધું હતુ. આવા સમયે ભરૂચ સાંસદનું આ નિવેદન ઘણું મહત્વનું બની ગયુ છે. વળી, જ્યારે આ અંગે પત્રકારો દ્વારા તેમને સવાલ પૂછવામાં આવ્યો ત્યારે તેમણે પોતાના બચાવમાં કહ્યું કે, સરકાર અને પોલીસ દારૂના અડ્ડા પર કાર્યવાહી કરતી જ હોય છે.
બીજી ઘટના એમ બની કે, સાંસદ નર્મદાના જે કાર્યક્રમમાં ઉપસ્થિત હતા, તે કાર્યક્રામ 'પ્લાસ્ટિક મુક્ત ભારત' અંતર્ગત યોજાયો હતો. જેમાં કેન્દ્ર સરકારના પર્યાવરણ વિભાગ દ્વારા નિર્મિત વાંસમાંથી બનાવાયેલી બોટલનું નિદર્શન કરાયું. બાદમાં તે બોટલનું લોન્ચિંગ કરી પ્લાસ્ટિક અને પ્લાસ્ટિકની બોટલો ન વાપરવાનું પણ આહ્વાન કરવામાં આવી રહ્યું હતુ. જ્યાં વાંસની બોટલના ફાયદા પણ ગણાવાઈ રહ્યાં હતા. વળી, પ્લાસ્ટિકની બોટલના ગેરફાયદા પણ ગણાવી દીધા. પરંતુ આ જ સમયે પ્રશાસન દ્વારા મંચસ્થ મહાનુભાવો માટે પ્લાસ્ટિકની બોટલોમાં પીવાનું પાણી મુકવામાં આવ્યું હતુ. જ્યાં સાંસદને આ અંગે પત્રકારો દ્વારા સવાલ પૂછાતાં તેમણે ખુલ્લા દિલથી એકરાર કરી કહ્યું કે, 'હા, અમે સ્વીકારીએ છે કે, દરેક કાર્યક્રમમાં આવું થાય જ છે. નર્મદા કલેક્ટર દ્વારા ધ્યાન પણ દોરવામાં આવ્યું છે. હું પણ કહું છુ કે પ્લાસ્ટિક વિરૂદ્ઘની ઝુંબેશ આપણાથી શરૂ કરવી જોઈએ અને પ્લાસ્ટિકની બોટલનો વપરાશ બંધ કરવો જોઈએ'
આમ, એકસાથે બે આમ રમૂજી પરંતુ સરકાર અને સાંસદ બંનેને ગોથે ચઢાવે ઉપરાંત શરમમાં મૂકે તેવી ઘટનાઓ બનતા લોકોમાં તેની ભારે ટીખળ ચાલી હતી.
