- મોરબીમાં યુવાન હત્યા પ્રકરણમાં પત્નીના પ્રેમી સહીત બે ઝડપાયા
- હત્યારી પત્ની અગાઉ મોટાભાઈની પત્ની હોવાનો ઘટસ્ફોટ
- કેવી રીતે આપ્યો હતો હત્યાને અંજામ ?
મોરબી: શહેરના કાંતિનગર વિસ્તારમાં એક વ્યક્તિને જમીનમાં ખાડો કરી દાટી દીધો હોવાનો મામલો સામે આવતા પોલીસ દોડતી થઇ હતી અને ખાડો કરીને દાટી દીધેલા મૃતક યુવાન કબીર ટેકરી વિસ્તારમાં રહેતો શૈલેષ અગેચણીયા હોવાનું ખુલ્યું હતું અને મૃતક યુવાનની પત્ની યાસ્મીન ઉર્ફે આરતી અગેચણીયા અને તેના પ્રેમી જુમા સાજણ માજોઠીએ મોતને ઘાટ ઉતારી ખાડો કરીને દાટી દીધાનું ખુલ્યું હતું. પત્ની યાસ્મીન ઉર્ફે આરતીએ જુમાં માજોઠી સાથે ઘર માંડી રહેતી હોય જે પતિને ગમતું ન હોય જેથી પ્રેમી સાથે મળીને મોતને ઘાટ ઉતાર્યો હતો.
હત્યામાં બેથી વધુ શખ્શોની સંડોવણી હોવાનું જાણવા મળ્યું હતું
આ બનાવ અંગે મૃતકની બહેને પોલીસ ફરિયાદ નોંધાવતા પોલીસે તપાસ ચલાવી હતી. પી.આઈ. આઈ. એમ. કોઢિયાની ટીમે હત્યાની તપાસ ચલાવી હતી. જે હત્યામાં બેથી વધુ શખ્શોની સંડોવણી હોવાનું જાણવા મળ્યું હતું. બી ડીવીઝન પોલીસે હત્યાના આરોપી જુમા માજોઠી અને શાહરૂખ મેહબૂબ મેમણ એમ બે શખ્સોની ધરપકડ કરી છે. તો હત્યારી પત્ની યાસ્મીન ઉર્ફે આરતી તેમજ આરોપી જુમો પણ પોલીસના હાથવેંતમાં હોવાનું સુત્રોમાંથી જાણવા મળ્યું છે.
હત્યારી પત્ની અગાઉ મોટાભાઈની પત્ની હોવાનો ઘટસ્ફોટ
હત્યારી યાસ્મીન ઉર્ફે આરતી અગાઉ મૃતક શૈલેશભાઈની પત્ની હતી અને પતિ મર્યા બાદ દેરવટુ કર્યું હતું અને શૈલેશ સાથે ઘર માંડ્યું હતું. એટલું જ નહિ છેલ્લા એક વર્ષથી તે આરોપી જુમા સાથે રહેતી હોય અને જે મામલે જુમા સાથે શાંતિથી રહેવા ઇચ્છતી હોવાથી પતિને મોતને ઘાટ ઉતારવા જુમાને ઉશ્કેર્યો હતો.
કેવી રીતે આપ્યો હતો હત્યાને અંજામ ?
હત્યારી પત્ની યાસ્મીને જુમાને ઉશ્કેર્યો હતો. જુમા સાથે સંબંધને પગલે પતિ શૈલેશ માથાકૂટ કરતો હોય જેથી યાસ્મીને જુમાને ઉશ્કેર્યો હતો. આરોપી જુમાએ તેને કબીર ટેકરીમાં મારી શકે તેમ ના હોવાથી ઉશ્કેરી કાંતિનગર બોલાવ્યો હતો. જ્યાં આરોપી જુમો અને શાહરૂખે તેને માર માર્યો હતો અને ઓરડીમાં બંધ કરી દીધો હતો. જેથી તે મૃત્યુ પામ્યો હોય અને બાદમાં મૃતદેહને ખાડામાં દાટી દીધાનો ખુલાસો થયો છે. જે હત્યા પ્રકરણમાં પોલીસે બે આરોપીને ઝડપી લીધા છે. તો હત્યારી પત્ની અને આરોપી જુમાનો બનેવી પોલીસના હાથવેંતમાં હોવાની માહિતી પ્રાપ્ત થઇ છે.
આ પણ વાંચો : મોરબીમાં પ્રેમી સાથે મળીને પત્નીએ પતિને મોતને ઘાટ ઉતાર્યો
