મોરબી: લોકડાઉન બાદ સરકારે હવે વેપાર ધંધા માટે છૂટ આપી છે અને બજારો ધમધમવા લાગી છે. ત્યારે વેપારીઓ માસ્ક વગર જ વેપાર કરતા હોય તેમજ નાગરિકો પણ બજારમાં જતા માસ્ક ન પહેરતા હોવાથી પાલિકા ટીમે પોલીસને સાથે રાખીને દંડ ફટકારવાનું અભિયાન આદર્યું હતું અને વેપારીઓ સહિતના 134 લોકોને દંડ ફટકાર્યો હતો.
અનલોક-1માં વેપાર કરતા વેપારીઓ અને નાગરિકોએ માસ્ક પહેરવું તેમજ સોશિયલ ડિસ્ટન્સ સહિતના નિયમો પાળવાના હોય છે તેમ છતાં માસ્ક વગર જ વેપારીઓ વેપાર કરતા હતા, જેથી પાલિકાના ચીફ ઓફિસર કલ્પેશ ભટ્ટની સૂચનાથી સેનિટેશન ઇન્સ્પેકટર કૃષ્ણસિંહ જાડેજા સહિતની પાલિકાની ટીમે એ ડીવીઝન સ્ટાફને સાથે રાખીને દંડ ફટકાર્યા હતા.
મોરબીની મુખ્ય બજાર સહિતના વિસ્તારોમાં પાલિકા ટીમ ફરી હતી અને માસ્ક પહેર્યા વગર વેપાર કરનાર વેપારીઓ તેમજ નાગરિકો સહીત બે દિવસમાં કુલ 134 લોકો માસ્ક વગર મળી આવતા 200 રૂપિયા દરેકને દંડ ફટકારી કુલ 26,400 નો દંડ વસૂલવામાં આવ્યો હતો.
આગામી દિવસોમાં પણ કાર્યવાહી ચાલુ રહેશે તેમ પાલિકા ચીફ ઓફિસર દ્વારા જણાવવામાં આવ્યું હતું.
