વાંકાનેરમાં સમાજ સુરક્ષા ટીમે 12 દિવસમાં 10 બાળલગ્નો અટકાવ્યા

મોરબીઃ ઓદ્યોગિક રીતે વિકસિત મોરબી જીલ્લામાં હજુ બાળ લગ્નનું દુષણ જોવા મળી રહ્યું છે. સમાજ સુરક્ષા ટીમ દ્વારા સતત બાળ લગ્ન અટકાવવામાં આવી રહ્યા છે. આજે વધુ એક બાળલગ્ન અટકાવી કાયદાની સમજ આપવામાં આવી હતી. તો 12 દિવસમાં 10 બાળલગ્નો અટકાવ્યા હતા.

આજે વાંકાનેર તાલુકા વિસ્તારમા બાળલગ્નની ફરિયાદના આધારે બાળ લગ્ન પ્રતિબંધક અધિકારીની કચેરી મોરબી દ્વારા સ્થળ પર જઈને ચેકિંગ કરવામાં આવ્યું હતું. જેમાં એક દીકરીની ઉંમર નાની હોવાથી માલુમ પડયુ હતું.

બાળલગ્ન પ્રતિબંધક અધિકારી અનિલબેન એફ.પીપળીયા, પ્રોબેશન ઓફિસર સુનિલભાઈ રાઠોડ તેમજ રંજનબેન મકવાણા, સમીરભાઈ લધ્ધડનાઓએ વાંકાનેર તાલુકા પોલીસને સાથે રાખીને નાબાલિકના લગ્ન રોકી દીધા હતા. તેમજ ઉપસ્થિત લોકોને બાળલગ્ન પ્રતિબંધક ધારો 2006 સમજાવ્યો હતો. ઉલ્લેખનીય છે કે છેલ્લા ૧૨ દિવસમાં સમાજ સુરક્ષા ટીમ દ્વારા કુલ ૧૦ બાળ લગ્નો અટકાવવામાં આવ્યા છે.