અધિકારીઓએ મુલાકાત દરમિયાન ડેમમાંથી પાણી લેવા માટેના જોડાણો હટાવી દીધા હતા અને ખેડૂતોને પિયતનું પાણી નહિ જ મળે તેવો સ્પષ્ટ સંકેત આપી દીધો છે. ત્યારે બુધવારે ડેમ સાઈટ પર ખેડૂતોએ પોતાની વ્યથા વર્ણવી હતી અને પાકને આખરી પિયત નહિ મળે તો, ખેડૂતો દેવાદાર બની જશે તેમ જણાવ્યુ હતુ. જેથી અધિકારીઓને છેલ્લા 10 દિવસ પાણી આપવાની આજીજી કરી હતી. વધુમાં ખેડૂતોએ પાકને પિયતનું પાણી નહી આપવામાં આવે તો, આંદોલનની ચીમકી પણ ઉચ્ચારી હતી.
તંત્રના પિયત માટે પાણી ન આપવાના નિર્ણય અંગે સિંચાઈ અધિકારીએ જણાવ્યુ કે, બ્રહ્માણી ડેમમાંથી હળવદ નગરપાલિકા પીવાનું પાણી વિતરણ કરે છે. આ જળ જથ્થો પીવા માટે અનામત રાખવામાં આવ્યો હોવાથી ખેડૂતોને પિયતનું પાણી આપી શકાય તેમ નથી. જેથી ડેમમાંથી પાણી લેતા અટકાવવા જોડાણો કાપવામાં આવ્યા છે અને આ કાર્યવાહી આગળ પણ ચાલુ રહેશે. જ્યારે તંત્રની કાર્યવાહીને પગલે ખેડૂત આગેવાન જણાવે છે કે, ગત્ વર્ષે ઓછા વરસાદથી હળવદ તાલુકો અછતગ્રસ્ત જાહેર કરવામાં આવ્યો હતો. હાલ ખેડૂતોએ વાવેતર કર્યુ છે અને છેલ્લી વખતનું પિયત બાકી છે ત્યારે પાણી નહિ મળે તો ખેડૂતોનો પાક નિષ્ફળ જશે. આવી રીતે તંત્ર છેલ્લી ઘડીએ મનઘડત નિર્ણય કરે છે જેથી ખેડૂતોમાં રોષ ફેલાયો છે.
