ધ્રાંગધ્રા બ્રાન્ચ કેનાલ સાફ કરો નહીં તો ખેડૂતોને નુકસાન થશેઃ ભારતીય કિસાન સંઘ

ધ્રાંગધ્રા બ્રાન્ચ કેનાલની ડી-19ની સાફ સફાઈ તેમ જ સિલ્ટ (કાંપ) માટી કાઢવાની માગ કરવામાં આવી છે. આ માગ સાથે ભારતીય કિસાન સંઘના પૂર્વ પ્રમુખે સૌરાષ્ટ્ર શાખા નહેરના કાર્યપાલક ઈજનેરને પત્ર લખ્યો છે.

• ધ્રાંગધ્રા બ્રાન્ચ કેનાલની સાફ સફાઈ કરવા માગ કરાઈ
• ભારતીય કિસાન સંઘના પૂર્વ જિલ્લા પ્રમુખે કરી રજૂઆત
• બ્રાન્ચ કેનાલમાંથી પાણી આવી શકતું નથી

મોરબીઃ ભારતીય કિસાન સંઘના પૂર્વ જિલ્લા પ્રમુખ રાણા નરેન્દ્રસિહ દ્વારા સૌરાષ્ટ્ર શાખા શહેરના કાર્યપાલક ઈજનેરને પત્ર લખી રજૂઆત કરી છે. જેમાં જણાવ્યું છે કે, ધ્રાંગધ્રા બ્રાન્ચ કેનાલની ડીસ્ટ્રીબ્યૂટ્રી ડી-19માં ગત 3 વર્ષથી સાફ સફાઈ કે કાંપ કાઢવાની કામગીરી કરવામાં આવી નથી. જેથી માટીના થરની જાડાઈ ઓફ ટેઈક પોઈન્ટ મળતા હેડ (પાણીની ઉંચાઈ)થી પણ વધુ છે. બ્રાન્ચ કેનાલમાંથી પાણી આવી શકતું નથી. ધ્રાંગધ્રા બ્રાન્ચ કેનાલમાં ડી-19ના એચઆરથી નીચે વાસમાં ધ્રાંગધ્રા બ્રાન્ચ કેનાલમાં ગેટ મૂકવામાં આવ્યો નથી. જેથી બ્રાન્ચ કેનાલમાં પાણીનું લેવલ વધતું નથી અને ડી-19માં પાણી આવતું નથી.

ખેડૂતોને આ પાણીથી નુકસાન થશે

શિયાળુ પાક વાવેતર હાલમાં ચાલી રહ્યું છે. જો ડી-19માં પાણીનું વહન ન થાય તો રણજિતગઢ, રાયસંગપુર, ચાડધ્રા, મયુરનગર, અમરાપર, મિયાણી અને મયાપુર સહિતના ગામના ખેડૂતોને નુકસાન થવાનું છે અને વર્ષ નિષ્ફળ જશે. જેથી ડી-19માંથી માટી (કાંપ) કાઢવા માટે તેમ જ ધ્રાંગધ્રા બ્રાંચમાં સીઆ ગેટ મૂકવા અનેક વખત રજૂઆત કરવા છતાં જુદી-જુદી મર્યાદાઓ બતાવી કામ થતું નથી. જો આ કામ તાત્કાલિક ધોરણે ન કરાય તો ગાંધી ચિંધ્યા માર્ગે આંદોલન કરાશે.